學習德語 · 28.02.2018

【德文考試】全民DSE？想考DSE德文的你請入

Chief Secretary for Administration - My Blog - Boosting DSE students' morale

"朋友 ,

其實你不妨將你想免費考DSE德文既事

分享俾咁多位巴打聽

咁樣一直俾人鼓吹 ,

我諗你就算德文水平再低 , 都會想考吧

有好多人係剛剛學德文既時候

會因為德文差，受到嚴重既挫敗 , 或者屈辱

而變得極度自卑 , 繼而僧恨自己 , 逃避現實

係呢個時候 , 免費德文考試就往往成為佢地既安樂窩

由於佢地自卑 , 繼而令佢地唔肯面對世界

因此佢地會以為DSE德文真係一個

唔駛錢有得考 , 自己考成點都唔會有人知既地方

只不過 , 佢地完全唔知道

係呢一個DSE嘅考場內

就算你可以屈機所有考生

但係你既德文,語言能力 ,

永遠都唔會因為你考完呢個免費嘅試 , 而得到認可

(btw , 你Writing可以寫既野 , 都未必少得太可憐喇:-( )

無端端考試而帶來心靈上既空虛

唔係好受架

所以

試下面對自己 , 面對現實啦

你仲可以返轉頭架 , AS8683:)

起碼大家都用緊一個你睇唔順眼既角度關心緊你丫 , 係咪?;-) "

財政預算案唔肯派錢，但係有幾個大膽嘅動作。一，送一萬海洋公園門票，近乎係倒錢落海，我真心覺得無謂…另外一個『優惠』，就係豁免2019年DSE嘅考試費。

一早就應該啦，X！

唔單止要豁免2019年嘅考試費，更加應該將呢個政策恒常化，所有在學，適齡，要考DSE嘅香港學生，考試都唔應該俾一毫子出嚟，呢個係教育政策嘅一部分，你有十二年免費教育，嗰少少嘅考試費，你唔當成教育支出？再去得遠啲，而且應該將所有Past Paper同Marking Scheme嘅版權完全公開，唔需要話你影印少少卷嚟操都要犯個靚法。

其實，考評局運作上嘅目標，根本就唔應該係為咗盈利。我以前考CE同AL，要畀幾千蚊出嚟，真係好肉痛。啲考試已經折磨到你要生要死，仲要我磅水，所謂貼錢買難受，所言非虛，考嘅時候都考得唔係太順氣。

全民DSE？

唔好意思，小弟唔係太想做時事評論員，返返入個正題先…我見到呢個消息之後，即刻發現Facebook充滿住『全民DSE』嘅Post，而亦都見到有朋友話要去考德文，因為免費喎。

我心諗，果然係香港人，一講話免費，唔理三七二十一，攞咗先。

喂，你仲考唔夠？我感覺經歷過香港教育制度壓逼嘅人，好有可能患上咗程度唔低嘅斯德哥爾摩症候群，或者直接係有被虐傾向…老實講，唔係有需要的話，無端端做乜走去考試？時間就是金錢，唔係話你唔可以去考，但係免費唔免費，唔應該係你決定考唔考嘅原因。你話我似陶傑，崇洋都好，大部分德國人都唔會咁得閑同你去計呢啲婆乸數，正所謂贏粒糖輸間廠，我懷疑德國點解咁多廠，香港咁少，個原因就係俾呢啲香港人敗曬…

話雖如此，我都好好奇——會考高考DSE一路都有德文考呢個事實，我一早就知道，但係真係無特登走去睇下佢份卷到底係點嘅樣。

如果我去考的話，成績會點？——其實我無興趣知道，不過教得德文耐，依家有幾個學生都有去考唔同程度嘅德文考試，例如歌德嘅分級試，A1到B2，或者係TestDaF都有。我自己依家無『考試衝刺班』，啲學生想考試的話，我都係自己睇下份卷，幫佢分析下，講解下點答題；而TestDaF自己考過，所以真係會分享一下自己嘅經驗。但係始終都未有實際嘅系統，自己都諗緊點樣可以有條理地喺考試之前幫啲學生準備一下，始終考試都係一個關口，有人幫忙，點都一定會輕鬆啲。

所以我自然對於所有德文考試嘅考核模式，難度，試題形式會有興趣，當係持續進修啦。

我對於『免費攞咗先』呢個做法唔係十分之理解，但係你考慮得考DSE德文，本身嘅德文水平一定唔會差（劇透：依家已經可以同你講定，你無B1，入去考真係純粹浪費人生寶貴嘅光陰），而準備考試嘅過程，都一定係促進自己學習德文嘅機會，而呢樣嘢，不管你嘅動機如何，我都一定鼓勵嘅。

我喺度想俾一個框架大家，假如大家真係想考DSE德文，有咩應該知道。

DSE德文考試起源

如果你去考評局個網站查詢一下德文考試嘅Syllabus，你會發現原來係Cambridge International AS&A Level嘅課程大綱。德文都有AS同AL嘅分別，其實考試形式近乎一樣，只不過AL多咗一份卷，係Component 4，要睇指定嘅Reading Material然後再答問題——C2寫作都有呢個Option，不過真係好Hardcore，我自己買咗指定嘅小說嚟睇，好惡頂，所以好早就放棄咗做Reading嘅寫作題。不過，DSE德文係AS程度，所以第四分卷大家唔需要考。老實講，你叫我去考，我一定考到，不過準備嘅時間會又長又痛苦，所以呢度可以鬆一口氣先。

所以，DSE德文只不過係披著DSE皮的AS German狼。由現在起，大家都可以用Cambridge International 嘅8683去辨認呢個考試。

知道咗呢個事實之後，要了解呢個考試就容易得多啦。

認授性

其中一個我唔鼓勵大家抱住『免費九考（免費的話考九次都無妨）』嘅心態去考嘅原因，係呢個考試嘅認授性。講歐洲語言，大家都知道最權威嘅係CEFR個框架，而我喺網上遍尋劍橋AL同CEFR嘅轉換，都搵唔到相關嘅結果，有一個網站有作出一個比較：

CEFR Level	Cambridge General English Exams	Languages Ladder	National Curriculum (England)	National Exams (England)	Guided Learning Hours
A1 Breakthrough		1-3 Breakthrough	1-3	NQF Entry Level 1-3	Approx 90-100 hours
A2 Waystage	Key English Test (KET)	4-6 Preliminary	4-6	Foundation GCSE	Approx 180-200 hours
B1 Threshold	Preliminary English Test (PET)	7-9 Intermediate	7-8 & EP*	Higher GCSE	Approx 350-400 hours
B2 Vantage	First Certificate in English (FCE)	10-12 Advanced		AS / A / AEA Level	Approx 500-600 hours
C1 Proficiency	Certificate in Advanced English (CAE)	13 Proficiency		University Degree Level and above	Approx 700-800 hours
C2 Mastery	Certificate of Proficiency in English (CPE)	14 Mastery		University Degree Level and above	Approx 1000-1200 hours

資料來源：http://www.ict4lt.org/en/en_mod4-1.htm#cef

但係呢個計算方法係根據英文嚟做，而且唔係一個官方嘅換算表，所以只能夠做一個參考。

就咁睇，似係B2嘅水平。

不過，A Level個原意都唔係用嚟判斷你嘅語言水平，重要嘅係你考試及格，得到一個資歷Qualification，可以用嚟報大學等等。CEFR係一個設計課程同評價語言水平嘅框架Framework，等大家可以用一個比較客觀嘅描述去將學生分成唔同嘅語言等級，所以目的有少少唔同。

重點係：如果你考完之後，CEFR轉換唔到的話，呢個考試考完你用嚟做乜？

考試時間

原來以前一年有兩個檔期，依家得一個，如果根據返2017同2018年嘅時間表去推算，2019年考試時間應該會係喺今年2018年十月中到十月尾之間。成績會喺2019年一月尾出。

屈指一算，如果要準備的話，仲有大半年。

考試模式

參考返考評局嘅Review，呢個Presentation好清楚咁列出咗考試嘅模式。

睇返劍橋個8683嘅Syllabus，其實會更加詳細。呢個考試有三分卷：

單元	Component 1	Component 2	Component 3
主題	說話	閱讀，寫作	議論文
時間	20分鐘	1小時45分鐘	1小時30分鐘
分數比重	30%	50%	20%
滿分	60分	70分	40分
內容	演講 20分主題對話 40分日常對話 40分	段落一 30分段落二 20分綜合性回應 20分	議論文(250至400字) 40分

我認為考試有以下特點...

詳細嘅考試要求，可以喺Syllabus度睇到，我自己無咁多心機睇曬，不過有幾個重點：

說話部分，演講要預先準備，其實唔難，因為題目自選，可以喺屋企練到爛熟，但係佔嘅分數唔多。

對話有分討論同吹水，有啲似我考C2嗰時個形式，不過當時係先吹水，後討論。至於考官會問你咩，我喺Syllabus搵唔到，C2就有好清楚嘅要求…不過我估計呢個水平唔會講講下問『你認為英雄主義喺現代社會是好是壞』呢類嘅題目掛…無錯，我C2嘅時候係搵咗呢條題目嚟講…嗰下真係諗起浩南哥…吹水的話，都係練多幾次就無問題。
Syllabus有好清楚寫到：需要對德國或者其他德語國家嘅現代社會有一定嘅認識。無論係口語或者係寫作，如果你唔展現一下你對德國嘅認識，分數一定唔會高（演講部分直頭分數會扣一半）！而口語都話你要問考官資料同意見，呢下都幾新鮮。
Reading嘅題目同深度，我自己感覺係同歌德B2接近，都係從報紙雜誌輯錄一啲科普或者Social Science嘅文章，睇完之後要你做搵答案，改寫句子，簡短答問題，最後要寫少少比較長嘅答案同個人意見，做Reading同時考埋Writing，形式好似DSH…其實我唔鐘意呢種考法，不過係個人喜好咁解。
 議論文每年有特定Topic，其實好容易準備，貼題亦都十分容易，2019題目如下：

Human relationships

Law and order

Work and leisure

War and peace

Pollution

綜合難度及歷屆試題

參考一下2017年最新一屆考試嘅試題，再綜合以上嘅資料，自己又睇過一兩份Past Paper，我會覺得呢個8683水平大概係B2左右，考得過C1嘅人，必定可以高分達陣，B2的話考的過的話，就一定及格。

最後都係問返你自己啦，準備咁多嘢，搞場大龍鳳，就係考一個無咩認授性嘅免費考試，值唔值呢。

可能你真係諗住『釣勝於魚』，咁我希望呢篇嘢可以幫到你啦。