【德文考試】何謂瘋狂？救Grade 150小時！

No photo description available.

// 傳送門：我十分珍重的十二個Review https://www.facebook.com/StegermattsNachhilfeSer.../reviews/ //

早兩個禮拜，我教德文嘅經歷，添上咗好精彩嘅一筆。

我破咗自己嘅『最長連續補習』記錄——毫無間斷咁講咗超過三個半鐘書。

三個半鐘。

「最長連續補習」記錄

你可能唔覺得有幾長，比個標準你：正常嚟講，一堂係上個半鐘。而一對一的話，對於我嚟講，都幾辛苦，因爲要保持九十分鐘高度集中，即時回應學生嘅問題，刹那之間就要諗清楚要講咩。但其實最辛苦嘅係學生，經歷個半鐘嘅連續轟炸，學生個腦都必定會處於『超飽和狀態』。

你諗下，將呢個個半鐘嘅課堂，乘二，再加多半個鐘落去，其實祇能夠用『癡線』嚟形容。

上完嗰三個半鐘之後，一方面我嘅喉嚨同身體都係處於筋疲力盡嘅狀態，但係另一方面，我都好開心，好滿足，因為呢個課堂，喚起咗我四五年前嘅回憶。當時第一次膽粗粗教人德文，其實就係教一個都係嚟Mannheim讀書嘅師弟。其實我當初同佢講話我可以幫佢補德文，都係一個幾癡線嘅決定：一嚟我當時德文個底都仲未好穩陣，叫做有啲心得咁解，二嚟當時佢都係話想快啲打好個底，所以都係成個禮拜，日日踩單車嚟俾我補。

癡線還癡線，補完第一次之後，覺得其實幾正，返唔到轉頭，斷斷續續私人教咗幾年，舊年就索性真係搞個網上補習社，竟然都收到一班學生。自此之後，遇到有急切需要，學德文學到灰機，但仍然有學德文熱誠嘅學生，可以的話，我會陪佢癲。

事源

早兩個禮拜，我收到Katie嘅報名表。内容唔多，重點係：兩個禮拜之後要重考B1。個『重』字令到我好好奇。所以我即刻打電話俾佢，同佢傾。原來佢因爲今年八月要去德國交換，而條件係要考到B1，否則無得申請學校，然後成個degree就要postpone一年…佢咁講，聽得出情況係幾嚴峻，言語之間已經滲透咗一種焦急同不安。

同佢傾完電話之後，尤其係知道佢重考嘅檔期，係大約兩個禮拜之後。我真係有少少保留，本來我依家都唔多教一對一，因為自己其實已經有好多班小組班，加上依家起緊屋，其實真係無咩空閒時間淨落嚟可以攝堂落去。而且我之前又無話真係好專業咁分析過點樣應付B1嘅考試，喺咁短嘅時間之內要做到一個效果出嚟，真係唔容易，否則學生花咗錢，花咗心機時間，仲付托埋一個希望俾我，最後我deliver唔到一個成績出嚟，咁就寧願唔補好過補。

我諗咗一陣，幫唔幫佢補好。不過好快我就無繼續諗—原因係，四五年前嘅回憶，又喺呢個時候彈咗出嚟。

補啦，依家已經毫無懸念

決定咗之後，就唔好講咁多嘢，嗱嗱聲上Amazon速遞兩份備試材料同一份模擬試題集返嚟。收到之後，即刻刨一刨，睇睇B1考試到底係咩料。而為咗上堂都可以用埋啲教材，放入筆記度同學生傾，我直頭將呢幾本價值超過六百蚊港子，新簇簇嘅教材剪開曬，再Scan埋。

以前我都係愛書之人，連用鉛筆畫花啲書都唔太捨得，但係呢幾年我已經改咗呢個習慣啦…無計，跟得德國人多，都講form follows function，買一本書返嚟，要嚟用就係要嚟用，剪都係咁話。

啱啱先Scan完，Katie通知我，話下一個考試檔期，係下個禮拜，無其他可能性。癲還癲，都要有個限度掛…我甚至叫佢睇睇臺北有無檔期，叫佢報定名。

六日呀！一個禮拜之前你仲唔合格，一個禮拜之後你要變做合格，談何容易？就算你要追嘅分數唔多，要提升，都唔係一時三刻嘅事啦。

救Grade 150小時

本來我仲話，隔日補已經好密，每堂短短地，可能就夠啦。知道呢個『一百五十小時』消息之後，我就知，就算我幾瘋狂咁同佢補，都唔會夠喉。

夠癡線，我鐘意。即刻推曬嗰六日全部可以推嘅Termin，取而代之，上堂！嗰個星期六，我就破咗三個半鐘呢個紀錄。

呢六日，雖然辛苦，但係真係『好好玩』。一方面我自己都要溫溫書，一方面我又要諗諗，點樣喺唔摧毀一個人大腦嘅情況下，將所有我覺得B1考試最重要嘅重點，用最有效，最濃縮嘅方法，注入佢腦海之中；解答問題，無時間去慢慢磨，但都唔可以有任何保留，唔可以俾佢帶住疑惑去考試，一定要一針見血；而且準備一個咁重要嘅考試，係人都有壓力，上堂時間又長，你無可能用沉悶嘅方式講書，一定要同佢一齊共同進退，提醒佢多啲休息，保持最佳狀態應試，用你對德文嘅Begeisterung鼓勵佢繼續努力。

六日過去，考試終於來臨。不過最重要嘅都係一個禮拜之後嘅結果。

『合格』。

收到Katie Message嗰下，滿足感涌出嚟嗰下，開心。

真係好開心，信我，我真係好開心。唔好咁肉麻，話咩非筆墨所能形容，呢種開心，係一個集合咗滿足感，驕傲，釋懷，戥佢高興嘅一種感覺。

睇到佢寫嘅Review，我好清楚，教德文呢個選擇，真係無錯。