【德國工作點滴】家鄉，係咩氣味？

今日一返到公司，入門口嗰一刻，我呆咗一呆，深呼吸：空氣入面，瀰漫住一陣『家鄉的味道』。

家鄉的味道

我成日覺得，氣味可以分開兩個類別，一種係涉及食物嘅氣味，另一種係涉及環境嘅氣味。嗅覺呢種唔能夠簡單重現嘅感官，尤其係唔涉及食物嘅時候，可以勾起好耐以前已經埋藏咗而又十分之特殊嘅記憶。你地一定試過，行街嘅時候，有人用咗一隻香水，嗰種香味，會即刻令你覺得似曾相識，繼而會令你諗起以前你認識嘅一個老朋友，因為佢以前都係用呢隻香水。或者係擁抱一個好耐無見嘅人，會即刻flash back返去去佢屋企嘅時光，因為佢身上就係帶有佢嗰種屋企獨有嘅氣味。

『香港』係咩味呢？好複雜，可以係旺角街邊魚蛋檔散發出一種混合咖喱味，牛雜味同雞蛋仔味嘅香氣，可以係屋企對面山打風落雨嘅時候，山風吹過嚟，混合雨水同沙塵嘅夏日泥土味。真係好難一概而論。

我合埋眼，索多一啖，終於清楚啦——係『家鄉假日的氣味』…

我依家流緊汗，因為太陽太曬，頭側埋一邊，上身赤裸，訓喺沙灘上面，吹緊海風，聽緊海浪聲，空氣就係有一種海水嘅鹹味，同少少海藻嘅草腥味。諗到呢度，我心頭都軟咗：我住德國呢頭，都有好多湖，可以成日去游水，但係呢種海鹹味同海草腥味，湖水係無嘅，所以真係即刻有少少懷念喺香港去沙灘放鬆嘅時光。

海藻的味道

我行入公司嘅展覽室，老闆手上面拎住一大抽成個人咁高嘅海藻。佢身邊仲有幾大袋唔同種類嘅海藻：原來有一個英國嚟嘅客人，係收集海藻嘅農夫，依家想買一部用嚟洗乾淨海藻嘅機器。見到喺清洗缸入面浮動嘅海草，就知道我聞到嘅氣味同呢個家鄉嘅聯想，係有根據嘅。

老闆見到我呆望住佢手中嗰抽海藻，似乎估到我諗緊咩：『Und? Riecht´s nach Heimat?』我笑咗一笑，老闆果然係老闆。之後個客，佢係一個英國老農夫，依家喺法國海岸收集海藻為生，一睇落去就覺得佢好平易近人嗰種，唔知點解見到我係亞洲人，可能當我係日本人啦，拉住我，用一口十分好聽嘅英國口音，話：『係呀，呢一種就係用嚟整紫菜嗰種，整壽司嗰種呀！』之後佢就一輪嘴同我介紹曬佢收集海藻嘅方法，價錢，味道，季節，用嚟點賣，可以點整沙律畀啲法國人食…

登登燈凳！海藻清洗機

食過紫菜（唔係你細個食開嗰隻四洲紫菜呀，大大塊用嚟落湯嗰種）都知道，最麻煩係啲紫菜有沙石，食到成口沙事小，遇到粒石咬崩牙事大。海草喺沙灘天生天養，唔多要打理，收集都相對簡單，但係最麻煩係清曬啲砂石出嚟，難度真係好高，尤其係高檔嘅紫菜，薄薄地，乸埋一抽，入面啲窿窿罅罅，藏沙甚多。

超！咁咪洗得乾淨啲，洗多幾次囉。嗱，凡事都有學問嘅，就係講洗菜點洗，我地已經有兩個專職負責設計洗菜過程嘅同事。你就咁望落去，就係一個大水缸，啲水噴嚟噴去，最後有塊震下震下嘅板，送啲菜出返嚟。但係為咗洗得乾淨，成個過程都要用極度精密嘅科學去計算。啲噴頭嘅角度，出水量，水缸下嘅空氣噴嘴，成個水缸嘅形狀，都係設計到令到啲菜可以喺水缸入面長時間迴旋式轉動，加上啲氣泡可以穿透啲窿罅，逼啲砂石出嚟，但係又唔會因為同水流大力撞擊而令到啲菜葉受損。當中就係流體力學嘅計算，同事已經做唔嚟，要俾一大筆錢出面專做Simulation嘅公司幫我地計。

有一次我個同事開咗嗰Simulation出嚟，睇住啲虛擬嘅菜葉喺個Mon上面轉嚟轉去，佢又好認真咁望住，個頭跟住啲『假菜葉』轉下轉下，我忍唔住笑咗出嚟…佢轉一轉頭，望住我，『Lustig?』我仲笑住點頭。『Diese Simulation hat 6000 Euro gekostet…』我即刻收咗聲…

『我好鐘意呢部機呀！』農夫先生一手摸住啲洗完白白嘅海藻，一面滿足嘅表情，『好悶呀！洗完出嚟，等粒沙都等咗好耐！但係都係咁順滑…』佢用開嗰部機，一啲都唔平，花咗一大筆錢買，洗兩次都唔乾淨，依家洗一次就乾淨曬，節省唔少人力物力之餘，賣嘅價錢，可以靚好多。負責銷售個同事，自己做到生意之餘，都真係好開心，第二日係咁同人講個客幾咁滿意，係咁重複個客講『我好鐘意呢部機呀！』『我好鐘意呢部機呀！』，講到我都覺得有啲煩…

No photo description available.

到個客走咗啦，我問老闆：啲海藻點呀？『都係要攞去堆填咖啦。』有陣時公司有個同事會帶啲試完嘅產品去佢屋企隔離個雞場餵雞，費事咁浪費…諗起連雞都有紫菜食，我點可以輸比隻雞？『咁我攞啲返屋企食。』望住半架貨Van咁多嘅海藻，我都食唔到咁多，唯有攞兩袋靚紫菜返屋企烘乾佢，慢慢當零食食，食得唔好嘥呀！其實都叫做係員工福利呀，哈哈！