學習德語 · 07.09.2018

【德文學習】Weniger ist mehr

好開心，收到一個學生幫我買嘅書。多謝曬你呀！

依家忙住湊仔，完全無時間睇書…其實老實講句，我自己以前係一條大書蟲，但係好可惜依家已經失去咗呢個習慣，有時間都未必會自己搵書睇。話雖如此，對於我嚟講，就算無時間深入咁去睇，起碼都可以好快咁揭下，翻查啲重點，印證返自己上堂講嘅嘢，可唔可以再用第二個角度去理解。而嗰幾本有關分級試嘅書，好自然係幫返自己提升應試技能，如果學生有計劃考試，可以更加有系統咁幫佢準備。

喺呢度，我想講講一個問題：好多人成日都問我，學德文，最好睇邊本書。

無。真係一本都無。

我自己睇嘅書都唔多，有咩資格話俾人知有咩書應該睇呢？
我反而成日講，依家呢個年代，資訊多到你接收唔曬，你最好先學下點樣揀嘢嚟睇。

我學德文，真係用過嘅，其實係學校俾嘅教科書。然後每次我都針對自己嘅需要，例如想睇睇啲Grammatik，就搵一本書嚟望下，真係一兩本咁大把。其餘時間，全部『上網問功課』。

查字典，上網；睇新聞，上網；聽收音機，上網；查Konjugation，上網；查Grammatik，上網。
呢個世界，上網有咩做唔到呢？

學德文，要嘅係一定嘅時間，全副嘅心機，細水長流嘅耐性，同埋適合自己嘅指導。資源呢一點，其實真係唔係太重要。

我見好多想學德文嘅人，買好多書，睇好多網站，想報好多名，搵好多老師，感覺好似做咗好多準備功夫。但係自己無每日花少少時間心機，靜靜地咁去讀，咁樣讀法，讀幾多年都好，都係嘥氣。
Weniger ist mehr. 德國人都有呢個講法。