【德國工作點滴】每月之星洗乜等月尾，月頭就發功啦！

『哈佬喎，本月月曆女郎！』中午放飯，大老闆離遠見到我，就已經潤我。

我做嘢間公司其實唔算好大，一百個人多少少，根據歐盟個講法，係介乎於『中』同『小』之間嘅中小企。德國中小企都出名多，唔入大公司，人工，福利係無咁好，但係細公司有細公司好，就係架構夠扁平，無一個坐喺二十八樓你唔知道係咩人嘅大老細。

『今朝返到公司，周圍都見到自己個chok樣，確實有少少唔自在…』個個部門都有掛日曆，到咗十二月，就到我呢個每月之星出場。

如果你睇下我公司個網站，有兩點我覺得值得分享一下。

最值得講嘅一定係我搵工嘅時候，公司係未確實有一個位，我係自薦嘅（即係所謂嘅Initiativbewebung）。

第二樣嘢係你發現我踩舊公司嘅內容其實係好隱晦咁出咗嚟——我畢業之後，轉過兩份工，先搵到我呢份做得好開心嘅工。

自薦成功，其實唔係代表我叻仔，喺度沾沾，而係代表我面皮夠厚…見工嘅時候，我係兵行險著，做咗一個好出位嘅舉動，之後先知道原來呢個係其中一個我受聘嘅原因——由於實在太危險，家庭觀眾切勿模仿，得閒我再同大家分享。

May be an image of 1 person

另外，其實我唔想唱我『前度』，但係搵工，有陣時好似搵老婆，唔啱的話，真係要及早走人。

本來，德國人對於轉工呢樣嘢，比起香港人敏感得多，德國人睇你CV，見你轉工轉得多，覺得你『坐唔定』，細公司請人係重大投資，怕請完你無耐又走人。

雖然我知道呢個事實，但係好彩我都無因此限制咗自己搵新工，結果終於俾我搵到份好工——都話唔係人工高福利好囉，而係有時星期一你會想返公司嗰種。

唔信？等我一月尾再同你講點解。到時我返香港放Elternzeit，放足三個月，一定會抽時間出嚟講返曬我所有一路好想講俾大家聽嘅故仔。