在德生活 · 16.01.2019

【石賈墨】男人放「產假」

終於都返到香港，好難想像，嚟緊兩個半月，都會喺香港渡過...

係呀，就算我無份生，都有份放『產假』...其實又唔係叫『產假』嘅，係『育嬰假』Elternzeit。

德國嘅育嬰假，父母（或者父父，母母，單身父母）都可以放，一個人可以放一年，加埋個『配偶時間』Partnermonate，兩個人夾埋，可以放成十四個月，期間人工係淨收入嘅大約七成，政府負責出錢，老闆要搵人頂替而已。

好大部分嘅德國父母，選擇育嬰假嘅時候，個阿媽都會揀放足一年，全職留喺屋企餵奶照顧小朋友，阿爸就出世嘅時候攞一個月，阿媽重新返工嘅時候又放一個月。

而我老婆為咗可以再喺香港生活多一次，講到明我一定要連續攞夠三個月，佢就攞十一個月，三個月一家大細喺香港放。幸福㗎！唔係因為唔需要返工…我講過啦，我係鐘意我份工嘅…對我嚟講，放育嬰假嘅重要性，係可以有機會每一日見證住自己個仔嘅變化，可以自己落手照顧，須知小朋友第一年會認住身邊嘅人做Bezugsperson，爸爸嘅面孔，我相信對佢嚟講都好重要。

有朋友近來生咗仔，老豆放五日侍產假...大佬，真係出完醫院嗰下就差不多要返工啦喎...到你放工返到屋企，佢又夠鐘訓啦，Bezug條毛咩…

當然，除咗享受同屋企人過下日晨之外，我都希望抽少少時間出嚟，重新啟動返我個教德文嘅計劃。想學德文啦喎，記得搵我食飯啦喎！