【石賈墨】港德分別？可能係我天真啦

啱啱先想寫一寫，咁耐無返嚟香港，有咩唔習慣，或者覺得德國同香港有咩唔同。

可惜，初三，就病咗，屙到九彩，我留喺屋企度休息，我老婆就同我外母出咗去玩。

訓訓下，我老婆打電話俾我，喊住咁話，我部電話俾人偷咗...

原來佢搭小巴嘅時候，手提電話從褲袋度跌出嚟，佢聽到，叫前後左右嘅人幫手睇睇。但部電話似乎飛咗去前面，咁無謂叫人搵啦，到總站再自己搵返。

到總站之後，佢搵緊電話嘅時候，一個後生仔問佢係咪搵緊部電話——原來頭先佢旁邊嘅一位仁兄執到部電話，問係唔係佢嘅，佢當然話唔係啦，然後呢位仁兄話：好啦咁我等佢打嚟，或者帶去站頭度。

但係最後個後生仔話佢落車之後，急步落咗車。

佢打俾我之後，我即刻嘗試打去佢部電話，亦即刻上網睇返部電話嘅位置。

打唔通，部電話最後同步嘅時間停留咗喺我老婆答完程小巴嘅時間。

最慘嘅係：我記得我有同我老婆搞Backup，我login完之後，發現原來個Backup唔work。

我老婆八月個仔出世到嚟咗香港嘅相同片，無曬。

我喺德國生活咗差不多十年，一定有試過跌銀包同電話，次數唔多，但係每一次焦急過後，都會有人問你係咪跌咗電話同銀包，如釋重負，再感激呢個幫你執返嘅人。

我老婆部電話唔係咩新iPhone，係一部用咗大半年嘅Sony，買嘅時候先係三兩千蚊，你攞出去賣，分分鐘賣得幾舊水。

幾舊水。

我覺得有啲難以置信...

佢地都話可能自己太天真，覺得落車嘅時候先再搵，應該有人會喺車門度等，或者自己都可以搵得返。

教訓：Check下自己個Backup work唔work，同埋，呢個世界，真係有人為咗幾舊水，幫其他人開個靚年...