【德國戰線】你唔怕得罪人咩？你咁做有咩用啫？你好得閒咩？

越無用，就越要做

命運就係咁。

好日我都唔病一次，開始眾籌之前就嚟場大感冒，到好返無耐嘅時候，香港就要發生啲咁嘅事件。

因為反送中呢單嘢，我放低咗好多本來做緊嘅嘢。我好想可以答曬所有聯絡我嘅人所問嘅問題，但係我想答咗呢幾條先。

你唔怕得罪人咩？你咁做有咩用啫？你好得閒咩？

你要知道，呢個世界有好多悲觀嘅人。我覺得悲觀係可以的，不過一個人嘅言行，唔應該俾自己悲觀嘅睇法影響。

你做嘅嘢，有用咩？我以前成日都會問自己呢條問題。好耐以前我會話無用，所以唔做。到年紀大咗少少之後，我同自己講，一定有用嘅，所以做，不過做嘅時候，會有一種唔舒服嘅感覺。

唔舒服係因為自己心底裡想做，所以覺得要逼自己相信做嘅嘢有用。你咁樣呃自己，做嘅時候，你心裡面有矛盾。

到今日，我好清楚答案係無用，但係都係要做。

係，越無用，就越要做。

法蘭克福反送中集會

我以前有個學生見到SCMP已經有出埋片，認得出我。睇埋留言就知道，我喺呢度講唔講自己嘅立場又好，出唔出我個樣又好，事實上已經無咩分別。咁我不如俾講埋我想講嘅故仔，希望大家聽過之後，可以明白點解我話越無用越要做。

講緊嘅，其實係香港人喺法蘭克福搞嘅反送中集會。去唔去法蘭克福參加集會呢個決定，我考慮咗好耐，本來我唔打算去嘅，但係我最後都選擇咗去。

仲要九號同十六號兩個禮拜日都去曬。

當日我老婆其實一早有約，參加一個朋友嘅婚禮，本來我要幫手湊仔，等佢可以輕鬆出席。我本身好唔鐘意自己做啲個人決定，會影響身邊嘅人，最重要都係怕影響到屋企人。點解我之前決定退出消防隊，呢個都係一個好重要嘅原因，不過呢個係後話，有機會先再講。

星期一至五，我老婆已經要日日湊仔，星期六日，我盡量會俾我老婆休息一下。我問我老婆，星期日我去法蘭克福得唔得呀？佢話：如果你覺得你可以為你家鄉做啲嘢，咪做囉。我知道佢要自己帶住個仔出街出咁耐，肯定會好辛苦，但係佢都先叫我上去…需知奧芬堡距離法蘭克福都有一段距離，揸車上歐韜班的話，都要兩個半鐘。來來回回，都真係成日無咗。

不過，我上到去先知道，原來好多人都遠道從其他城市過嚟，搭火車都有人搭成四五個鐘，我揸嘅兩個半鐘車程其實真係不是什麼。更有人帶住小朋友嚟參加集會，我諗到我自己以為拋妻棄子，好大犧牲，真係諗得自己太偉大。

到咗嘅時候，啱啱好係大家準備好曬紙牌嘅時間。好自然就要叫口號。

問題嚟啦，喺我地幾十個人當中，似乎無咩人有信心可以用曬三種語言嚟叫口號。大家你眼望我眼，搵緊一個可以帶領大家叫口號嘅人。

我知道邊個係搞手，咁就好自然望向負責入紙嗰位朋友。我發現佢都望住我，你眼望我眼。

我以為大家都係望住佢啦…我見到原來有份參與嗰四五十個人，好多都望住我。組織集會嘅人，根本就唔係我，只係可能因為我係『谷主』，大家又知道我識講德文，所以自動波向我投向『你嚟啦』嘅目光。

唔怕老實同大家講，我當時心入面係覺得有少少不知所措，心諗我上嚟都係想幫幫手，唔想話企喺前面，更加無諗過要領叫口號。

我嚟咗德國差不多十年，自然無參加過任何集會，而未嚟之前，我年紀尚輕，真係對政治無咩理解。所以你可以話我嘅政治觀念係喺德國建構出嚟嘅。呢個建構嘅過程，一路都好舒服，無咩負擔，喺德國，我就係『外國勢力』，得閒可以玩下Walomat，不負責任地同啲德國人吹水，可以隨便恥笑德國左膠橫行，又可以插下阿凡達有幾出位。

喂，第一次參加，你地就望住我？依家我企咗喺度，諗緊我點反應好。電光火石之間，我諗咗幾樣嘢，其中一樣嘢，引申去第二個問題：你唔怕咩？

怕？

本來我覺得，我係一個喺德國嘅香港人，小薯仔一名，有咩要怕？今日睇新聞，留學生返香港，都有啲臀部痕癢嘅警察叔叔截你，你就知道『怕』係有原因嘅。

兩次集會，都有人話想要戴口罩，正如我之前同蘋果做訪問嘅時候，我都有講過，我覺得有人受訪唔想出樣，集會要戴口罩嘅事實，好恐怖。我絕對唔係話想戴口罩嘅人係淆底獸，連出個樣都怕呢樣怕嗰樣。唔係，如果一個人恐懼政權的話，原因一定無可能係個人細膽，而係呢一個政權已經太可怕。

正正係呢種恐懼，每一個人更加要有嗰句講嗰句。

唔怕咩你？怕呀，我其實都怕搭過山車，但係每一次我有機會搭，我都同自己講，你今次淆底，你下一次一定會更淆，淆多幾次，你最後連搭碰碰車都淆。所以有陣時就算真係唔想搭，都要逼自己搭。

你唔一開始就堅持講真話——你可能覺得我誇張——但係終有一日你真係會講唔出。我呢啲已經離開咗香港嘅人，喺德國已經有第二個家，幸運地，健健康康，有一份穩定工作，有一個安樂窩，如果連我呢啲咁幸運可以喺德國生活無憂嘅人，都唔敢做多一步，講多一句，咁你覺得你自己可以點樣評價喺香港企出嚟嘅香港人？

諗到呢度，我就淨係講咗一句：『叫德文先呀係咪呀？』

到六月十二日，我以前教過嘅一個學生組織多一次集會，同一個地點，都係法蘭克福，不過今次有超過一百五十個人參加。我睇到咁多人嗰時，係真係呆咗。

除咗佢同一兩個德文比較好嘅朋友之外，我就延續咗上個星期嘅角色，繼續負責帶頭叫口號，讀埋份德文聲明。

我自己性格係咁，做親咩嘢，都唔鐘意混入太多情感落去。但係一群人走埋一齊，有一個共同嘅背景，有一個共同目標，就希望大家都有凝聚力。

所以我叫嘅時候，覺得好難控制自己點樣叫法。係，喺一個陌生嘅國度，德國人走過，任你叫得幾咁激情，聽到你用廣東話叫『林鄭下台』，有咩用？

所以，又係講有無用。

無用，對你嚟講可能就係最有用

我覺得，呢啲口號，係要叫俾自己聽，叫俾身邊嘅香港人聽。

我翻譯咗啲海報，有幾多德國人真係睇咗？我見到有十個八個，望咗一眼。九月六日之前我捱眼訓翻譯出嚟嘅聲明，好多集會都有人讀，但係有幾多個德國人真係有聽？我唔知。我翻譯嚟俾德國人睇嘅片，又真係有幾多德國人睇過呢，我都係唔知。

無論人數幾多，做到咩效果出嚟（柏林嘅香港人其實真係令到德國好多政黨同政府機關回應返呢件事，係有效果的），你對住香港依家呢個政府，真係無用。有效果，無結果。

你諗下，香港有二百萬人上街，政府最後都係保持五無。我身邊有德國朋友講，二百萬人？一人企出嚟屙一篤尿，政總都會沒頂。可惜，我自己都唔係屬於勇武派嘅人，我好欣賞肯堅持企出嚟嘅人，但係無奈大部分香港人都係順民，政府一定係食滑你，咁到底點樣可以搵到香港嘅出路，我真係悲觀，睇唔透。

不過。

一個人嘅記憶，取向，行為，係塑造一個人最重要嘅元素。我要記得我呢一個時刻嘅立場，我要記得我嘅香港人身份，我要記得我捱眼訓翻譯過，我叫到聲沙咁嗌過，我要做曬所有我可以做嘅嘢，我先係延續緊我自己嘅身份。

唔咁做的話，你會灰心，你會放棄，你會失去自我，你會『被長大』。你會慢慢覺得做廢老的話，其實都唔差。

所以，就算幾無用都好，唔代表我就選擇唔做。

呢個就係點解我上面講越無用，越要做嘅原因。

唔怕？

有一兩個朋友，見到我翻譯嘅片，好清楚有立場。佢地話：你唔怕無生意咩。

我明佢講咩。但係我唔怕。

我成日都話自己好彩，係一個德國工程師，喺呢邊都叫搵到食，淨返嗰啲時間用嚟做咩，好明顯就係自己真係想做，唔係為咗錢。你諗下，王迪詩想喺信報開個天窗都唔得。一個字六毫子，寫足五百個字，得嗰三舊水。大佬，香港依家食餐好少少嘅飯，都唔止呢個價錢啦。

不過我又好好彩，我教親嘅學生，個個立場都同我好相似。如果你因為我反對修例嘅立場而唔想搵我學德文，呢個係你嘅選擇，我控制唔到。

我咁睇，讀德文唔係好似你讀中英數咁，學校逼你去讀，你無得揀，你重要好俾心機去讀，因為呢個係現實嘅需求；讀德文，唔多唔少係一個好個人，好高層次嘅選擇。就算大把話嚟德國讀書嘅人，到最後都係唔讀德文。

所以嚟搵得我嘅人，其實都係另外抽時間，畀學費出嚟學，都真係本身好有心學。咁你讀一個國家嘅語言，一定係要對一個國家，有起碼嘅認識或者係認同。而通常學生想跟我讀德文之前，我都一定會了解佢地想讀德文嘅原因同背景。

『覺得德國係一個好有歷史背景嘅國家』

呢個講法，我聽過唔少。

咁如果你讀得德文，都仍然認為『人權』，『自由』，『平等』呢啲德國人重視到要寫入基本法嘅嘢，對於你嚟講都無咩關係的話，咁你其實就係名副其實嘅讀屎片。

咁如果你硬要讀屎片的話，你支唔支持我，我都無咩所謂。

蠢？

講起支持，我老婆無好似我咁癡住香港啲新聞，所以頭腦比較清晰，問我喂依家你個眾籌搞成點？

唉，本來一開始個勢真係好好，唔夠十日八日已經衝上目標六成。不過原來網絡世界真係咁殘酷，無賣廣告，眾籌條Bar就真係唔會點郁…

我本來打算詳細咁解答返之前好多人有問過有關課程嘅問題，仲想投稿去DW，仲想整一個學生訪問，不過依家唔會做得起，其實六月嗰陣時已經鋪排好曬，不過一開頭都已經病咗，搞到連個推出日期都守唔住，依家得返九日，距離目標唔遠，仲有兩成。不過我想幫人翻譯嘅嘢，都仍然未翻譯曬，剩返落嚟嘅廣告，真係唔知做唔做好。

尤其係眾籌呢家嘢，好講一開始道氣，你最後嗰幾日先嚟講你嘅課程有幾好，尤其係我呢啲好講Commitment嘅眾籌，人地連消化嘅時間都無的話，點會肯支持。有好多人WhatsApp問我，到底課程啱唔啱佢地用。有好多人期望可以淨係上我嘅課程而學好德文，咁我都好老實咁講，我做唔到呢個效果，都唔希望人地俾錢支持。眾籌係一個工具，如果因為想眾籌達標，而扭曲咗自己嘅初心，咁籌得成又有何用。

呢個計劃，其實係將我嘅一個想法付諸實行嘅第一步，眾籌計劃如果達唔到標的話，其實就係代表我嘅想法未必可以聚集到我預期中嘅能量。

假如失敗，原因只能一個，就係我做得唔夠好。

所以第三條問題，你反問都好，我都答你：你好得閒咩？——唔得閒，好唔得閒。你質疑我做啲『無用嘅嘢』，犧牲咗自己本身個時間表，蠢。

值唔值得，我上面答咗你。我又做一個比較呀：比起喺香港罷工罷市嘅人，我就算眾籌失敗，錢銀上其實都唔會有損失。香港做生意，做唔掂的話，係搵食都搵唔到，人地壓力大過我多多聲。我又要講自己係幸福留德華，真係輸極都唔會衰得去邊。

我咁講，大家可能覺得我唔在意計劃嘅成敗。我唔想大家誤會，我自己擺咗幾多心機時間，有幾真心希望自己嘅課程可以推到出嚟，對我有少少了解嘅學生同朋友，相信都好清楚。

尤其係已經支持咗，好期待個課程嘅朋友，臨門一腳先唔到入波的話，我對你地唔住。

贏五比零？輸五比六？

所以希望之前同我話等到最後先出手嘅朋友，呢幾日可以真係入FringeBacker支持我，如果唔係到最後一刻真係唔記得咗，好容易會甩轆。

All or nothing嘅眾籌就係咁。一開始我覺得自己贏緊5:0，最後5:6，先入你五粒，都可以輸㗎。

但係唔代表我之前做嘅一切會付諸東流，唔可以咁睇嘅。

都係嗰句啦，贏輸都好，應該做的話，都要做。

- 寫於從哥廷根出發而又例牌延誤的德鐵火車上