【德國登報】《法蘭克福匯報》- 香港正在淪陷，自由最後一戰！

奇跡，喺六月二十七日嘅《南德意志報》上面，發生過一次。

今日，即係八月十九日，《法蘭克福匯報》政治版首頁，再一次出現一封由香港人發出嘅公開信。*

標題係：

Hongkong fällt. Der letzte Kampf für die Freiheit.

『香港正在淪陷　自由最後一戰』

香港人的奇跡

同樣地，今次我繼續肩負聯絡報館嘅責任，亦都因為上一次嘅參與，今次順其自然，ViSdP後面都係出我個名。雖然上一次我已經講過，但我都不厭其煩再講多次：我個名有幸可以出現喺公開信上面，但係我自己無咩功勞，背後成個團隊，包括翻譯，校對，設計，協調，等等等等，先係公開信可以成功出現嘅原因。喺度，我再感激G20x攬炒團隊，再次創造奇跡！希望各位香港人唔好放棄，全世界都注視緊香港，我地一定要繼續堅持落去！

*註：晨咁早，打算去火車站買份FAZ，點知佢話今日收唔到，我周圍問極都買唔到…原來呢幾日德國天氣反常，一間印刷廠不幸被雷劈中，FAZ只能印出大約一半數量嘅報紙。不過FAZ立刻免費開放網上版俾大眾閱讀，而且答應聽日（八月二十日）會喺盡量前嘅頁面再幫我地登多一次，其實就真係接觸曬唔同階層嘅德國人！今次真係連雷神都要眷顧香港人！

香港人的覺醒

重要嘅嘢講完啦！喺度，我想講下我自己感受…

香港人，無論海外海內，喺呢兩個月，展現咗佢地不屈不撓嘅一面，接二連三咁創造奇跡。每一次，我都亦悲亦喜。

開心嘅係，我終於見到香港人潛藏於心，對於自由民主嘅追求。好多香港人，雖然平日無咩聲氣，好似淨係掛住搵食。但係今次大是大非之前，好多人都已經覺醒，直接間接參與呢個活動，令到我地知道，同路人並不孤單。

傷心嘅係，我地全部人打從心底裡，其實根本就唔想創造奇跡。尤其係我呢啲去咗外國嘅人，仲有咩要求啫，都係想平平淡淡咁繼續生活…

元朗黑夜，警黑合流，當時我覺得，香港嘅政權已經突破咗道德嘅底線，正式步入徹底腐敗嘅第一步。當時我出Post講過，『我為自己許下一個諾言：香港呢個PK政權一日唔倒下，我都會竭盡所能，用盡我僅有嘅時間同精力，奉陪到底，同你鬥長命。』

雖然我講呢句嘢，好想自己無咩情緒。但我承認，其實我係有一絲埋藏喺心底裡嘅怨恨。

點解？

我好好彩，喺今次反修例嘅革命牽起之前，我地一家三口，喺西貢渡過咗一個好美好嘅假期。同屋企人過年，同朋友約食飯，同老婆仔仔行街。我地當時完全唔知道，原來呢段美好時光，已經係香港年輕人同政府，同警察，同建制，同舊時代割離關係嘅最後倒數。

「已經返唔到轉頭啦。」

好多人咁講。

係。催淚煙終會消散，但係嗰一層毒害人體嘅微粒仲會永遠殘留喺香港嘅一街一行。

係。眼上嘅傷口總有一日會愈合，但係失去咗嘅視力，仲會伴隨住受害人嘅一生。

係。呢個極權政府可以繼續打壓，繼續派糖打經濟牌，扮成若無其事，但係俾警棍打過嘅後生仔，傷不在身，而係打碎佢地對香港未來嘅憧憬同夢想。

返唔到轉頭㗎啦。

搞咗咁耐，我都無好細心咁睇呢份公開信…今晚我開返份嘢出嚟，仔細望…加上我諗到呢度，好清楚返唔到轉頭呢樣嘢，已成定局，手開始震，眼淚一路咁流。人嬲，好多時候都係一件事而引起，但係唔係，呢種憤怒，係一種混合住悲憤，痛心，無助嘅感覺。

呢一種感覺，我一早就有，望住公開信上面煙幕瀰漫嘅香港，先至會突然無限放大。

畀返個香港我。

我要你畀返個香港我！

...我知，講係無用嘅。

依家你睇到呢個Post嘅時間，我去完Stuttgart一趟。去Stuttgart嗰目的，係搵Dietrich Wagner同佢做專訪，仲會搵埋德國嘅水炮車法律專家。我要全世界都知道水炮車有幾危險，幾唔人道！而偏偏香港警察都仲要用！

今晚我都已經開咗一個會，同其他有心嘅香港人一齊，行開始建立一個e.V.嘅第一步，我好希望喺德國，香港人都可以有一個代表到自己嘅協會。

仲有好多嘢，我同埋好多喺德國嘅香港人都做緊。時機成熟，我會話俾大家知，希望大家到時可以盡力參與。

我唔會停，到有一日你畀返個香港我，我先會收手。