【時代革命】你覺得你贏嘅一剎那，就已經輸咗

$立場新聞圖片$

大家好，小弟係石賈墨，今日我好想同大家衷心咁講下，我呢兩個月嚟嘅感受。如果認同的話，我希望大家可以將我同其他在德港人嘅心聲，傳播開去。

今日，我對於香港嘅將來，我係前所未有咁擔心。嚟緊呢幾日，將會係成個逆權運動成敗嘅關鍵。

溫水煮蛙

如果用溫水煮蛙嚟做比喻，香港政府強推逃犯條例，猶如突然之間開足熊熊烈火，煮到隻隻青蛙都頂唔順，紮紮跳，跳足兩個月。依家係咁咦收少少煤氣，煲水由百度高溫，變做九十八度熱水。肯定有人講：喂！政府都收火啦，你睇下啲水都無滾到起曬泡，見好就收啦。

呢種諗法極危險。而我相信，香港人經歷咗兩個幾月嘅抗爭，個個都疲憊不堪，覺得好想退下來，今次政府搞咗咁耐，做咗呢個已經無關痛癢嘅決定，策略上極度奸險，點解我咁講，相信大家都好清楚。

好似我之前成日講嘅水炮車咁，佢本來一啲都唔危險，但係佢最危險嘅地方，就係啲人唔知道佢可以有幾危險。同樣道理，香港人係絕對可以贏，但唔會係今日。如果香港人輸的話，就係輸在依家有人以為自己贏緊五比零。

輸緊五球，俾你入到一粒，你當自己贏波？無可能。所謂五大訴求，缺一不可，其實就係講緊場波未追和，都一定要繼續踢落去。幾多隊友踢到遍體鱗傷，甚至傷重離場，依家連德國人都話要入場睇，你同我講話唔好再踢？

眼見呢個咁嘅情況，我係前所未有咁灰。

我自己係預咗打持久戰㗎啦，無一年半載，都係唔會有令人滿意嘅結果出現到。我自己唔明白，點解有人搞遊行集會，會講Endgame，根本就仲係Infinity War。我喺度真係好希望大家好好準備，當Endgame真係出現嘅時候，大家先會有能量可以捉緊機會。我知道咁諗，唔係每一個香港人都有咁嘅毅力，想像一個永無止境嘅抗爭。但係Be water，唔單單係衝嘅時候要做，整個抗爭都好似水咁，一滴一滴，水滴石穿。唔咁樣做，呢個民主運動，唔會有成功嘅希望。

咁樣諗，真係好難受，我知道，因為我呢兩個月嚟，都發覺自己已經進入咗一個從未經歷過嘅狀態。

係一種迷茫，係一種對自己嘅疑惑。

香港與民主自由的距離

我自從六月開始，我開始唔理解自己點解會『越踩越深』。一開始我幫下手翻譯，參加下集會，到之後幫手兩次登報，做水炮車專訪，再到聯絡唔同嘅德國人同媒體，甚至開始組織緊個e.V.。我望返轉頭，係完全唔明白。

我忽然覺得自己好陌生。

我仍然要返工，仍然要繼續整我嘅德文影片課程，仍然要湊仔，仍然要處理新屋嘅雜務，夜晚根本就無休息嘅時間。

左邊膊頭因為由返工到返屋企，全日都做鍵盤鬥士，都已經有啲問題。

傾電話，寫E-Mail，聯絡媒體嘅時間，完全毫無規律，撞正食飯嘅時間就索性唔食，搞咗咁耐，腸胃都出現問題。

我亦無再堅持做運動呢個習慣，又成日捱夜，訓得好差。

嚟咗德國咁耐，我平時一年最多病一次半次，但今年先九月，我病咗四次。最後一次係仔仔嘅手足口病惹到我，發咗兩日高燒，喉嚨劇痛咗成個禮拜。醫生話本來大人好少會惹到手足口病，可能係我未接觸過德國嘅病毒，所以中招。

我知道，係根本我依家身子已經差咗好多。

連老闆都話我返工有陣時『透明』，估計翻譯做廣東話，係『魂不守舍』。

我咁講，唔係話我自己好偉大，為香港做咗咩犧牲。無，呢個係一個好有意識嘅選擇。但係我係呢兩日先感覺到，我自己已經俾呢種價值同化，甚至覺得呢種諗法已經成為咗我嘅一部分。我心入面亦有一種越嚟越強烈嘅感覺，我一定要利用我自己喺德國嘅能力同經驗，再扮演好自己嘅角色，期望有朝一日，可以做到一個突破。

德國唔係天堂，但係我望住德國人，有民主，有自由，年青人有機會，只要努力，大部分人都可以安居樂業。遙望自己嘅家鄉，我從來都唔講『我愛香港』呢啲咁肉麻嘅嘢，但係自己回憶同童年入面，香港係一個幾咁可愛嘅城市。

我過去十年，都係喺德國渡過，可以喺呢個陌生嘅國度成家立室，生活安穩，點解？我以前身邊大把香港人，聰明過我，勤力過我，讀書多過我，佢地成就理應比我高幾班，但係我依家過緊嘅生活，佢地好多都覺得係夢想。

原因好簡單，因為有啲嘢，德國有，香港無。

依家香港人就係爭取緊呢樣嘢。我其實停唔到落嚟，係我無辦法自私咁無視香港同德國嘅差別，如果我可以做到任何嘢，可以拉近兩者嘅距離，我會毫不猶疑咁做。諗到呢度，我自己都嚇親，唔好意思，其實五大訴求，對我嚟講，唔係缺一不可。我自己唔貪心，『要一即可』。五大訴求，你前面四個唔回應，無問題，俾個真雙普選我，我即刻收工。

我專心做返個小小工程師，得閒風花雪月，講下德國趣聞，教下德文唔好。

我付出咗好多，但我做嘅嘢，相比其他喺德國嘅香港人，只係蚊比同牛比。

依家德國人終於注意到香港，思考緊香港喺中德關係嘅角色；媒體不斷希望了解喺德國人嘅諗法；黃之鋒封公開信，上曬德國媒體頭版；幾多柏林香港人不眠不休，聯絡政黨，政府機構，依家係叫做有一啲啲回音咁多。

齊上齊落

如果依家有人同我講，見好就收，我同你勢不兩立。

你呢個諗法，比起啲所謂嘅藍絲，更加有破壞性。人家擺明車馬有立場，邪惡極有限。你覺得用全世界香港人過去兩個月嘅付出，百萬遊行嘅汗水，六條人命，三隻眼，換嚟一句遲嚟嘅撤回，值得？

我都唔理你『動議撤回』係真定假，俾個折頭你，當你真係撤足百份之二百都好。值咩？連個獨立委員會呢個未必有用但好多人想要嘅訴求都無，你已經覺得要收手？不如我打到你殘廢，然後同你講句對唔住囉當無數啦？

我唔會停，反而我會更加落力。我希望你諗法同我一樣，可以繼續支持我，嚟緊好多嘢，都要大家幫忙，一齊做，齊上齊落。