【時代革命】回應返我呼籲停用「赤納粹」比喻所引起嘅疑問

相關文章：【時代革命】請立刻停止使用「赤納粹」比喻

我知道，呼籲停用『赤納粹』嘅講法，一定會引起爭議，不過我都照講，俾人插都咁話。

有人話我唔回應，話我走住嚟屌，我自己無呢個意思，不過有營養嘅討論，要啲時間消化同寫咁解。

我喺度希望可以再針對返回應我呼籲嘅意見，疑問，等大家明白我點解會咁講。

最後，我唔想重演『機場道歉』嘅爭議，你地睇完我點講之後，自己決定用唔用『赤納粹』。兄弟爬山，各有各做。屌人係唔駛本的，但係落手落腳做就唔係人人都做得到，如果睇完都覺得我係『維穩』，『五毛』，『左膠』，呢啲稱呼，我唔介意啃咗佢，你地屌得開心就可以。無所謂，我會喺德國呢邊繼續努力。

停用『赤納粹』比喻

首先，我想講一下提出呼籲嘅成個來龍去脈。

六月，個運動仲係叫『反送中』嘅時候，我以為最多淨係食下花生，但嗰時我就已經有諗，到底我可以做啲咩，可以幫到手。

一開始，我係翻譯啲德文媒體咁大把，等香港人可以理解一下德國媒體點樣睇呢場喺香港發生嘅運動。之後，我喺機緣巧合嘅情況下，參與咗G20團隊三次登報嘅行動，第一次趕頭趕命，自己落咗ViSdP個名，之後嘅參與就越嚟越多。

我嘅職責係幫手做德國登報行動嘅聯絡人，聯絡報館，而因為ViSdP焗住出咗嗰名，所以就做咗少量有披露自己身份嘅G20團隊成員，咁反正我都黃咗囉，我就有接受德國傳媒嘅訪問，主要係想redirect返啲注意力，去啲我認為重要嘅議題度。因為呢幾次登報行動，所以我自己關注多咗德國媒體，同好多記者都有聯絡，開始想知道德國呢邊點討論呢個議題。

依家，我已經將成個Vision放咗喺嚟緊嘅三年度。如果大家有跟開我寫嘅嘢，知道我嚟緊會搞一個e.V.，幫返呢邊香港人手先，亦都打算做一個行動上嘅轉型，不過呢個係後話，到時候我先同大家講。

尤其係最後一次嘅登報計劃，我花咗好多時間落去睇德國嘅報導，都叫對德國人睇呢場運動嘅睇法，有少少了解，亦都有同身邊嘅德國人，傳媒人有討論，大家都係得一個目的，就係希望可以用某啲方法，令到德國可以有所行動，向香港同內地施壓（點做我嚟緊會講）。

我一早就見到『赤納粹』呢個字，其實唔多妥當，本來都想講下自己睇法。余杰本《納粹中國》，我無睇過，到底佢點比較，我唔清楚。但呢個字喺香港流通，覺得唔會上到檯，我都認為無咩問題。

德國人對「赤納粹」比喻嘅反應

直到之前瑞士有報過一次『赤納粹』嘅比喻，雖然都係一句起兩句止，但之後就收到好多媒體人，德國人嘅『查詢』，想知道點解會有呢個比喻。佢地嘅疑惑，其實背後潛台詞就係：『台灣有學生玩過，內地有遊客玩過，估唔到連香港人都鐘意咁玩。』

你想我點答佢？

我唔係讀歷史，唔係讀政治，但如果你想知道，點解部分德國人會咁唔鐘意呢個比較，之前留言，有一個好好嘅比喻：『依家我見到有義士俾黑警射傷，我好傷心呀！直頭好似你上年老母生Cancer死咗嘅時候咁傷心，死老母咁傷心』

如果你係死老母嘅嗰位朋友，仲會唔會話：『你嘅比喻真係好精闢呀！我好清楚理解到你係有幾傷心！支持你！』唔會，正常人都唔會。正常人都expect對話入面，每個人都會尊重悲痛嘅過去，盡量唔會提起呢一段歷史。

用返同樣道理，你用呢個比喻都唔係話唔得，但係你要用落一個Context度：『上年你傷心到喊到爆，唉，依家我終於體會到你舊年失去親人嘅痛苦，希望你可以安慰下我啦。』我絕對唔反對香港人攞黑警『曱甴』論嚟講，唔反對網上面對比Gestapo同黑警嘅圖片，呢啲有Context，局部嘅比較，係做到大家想做嘅效果：話俾人知，香港警察，中共，有幾邪惡。

但係我嘅言論一出，好多人就認為：『佢叫人唔好用赤納粹，即係覺得中共唔夠邪惡，即係幫中共塗脂抹粉。』你要咁諗，我無辦法。我知道新疆維吾爾族，西藏發生緊咩事，中共七十年以來殘害過幾多中國人，我都算叫知道。呢度有一個觀點我想提出：技術上比較納粹德國所做成嘅死亡人數，同中共殘害過嘅人頭，係無意思的。納粹德國所引起嘅係世界大戰，係實實在在嘅戰爭，係一場涉及幾十個國家嘅浩劫，成個歐洲，幾多個人係經歷過納粹德國所帶嚟嘅毀滅，對於歐洲人嚟講，納粹嘅歷史，唔係一啲可以用嚟隨意比較嘅題目。

我咁講，唔係話新疆維吾爾族所受到嘅逼害『唔夠慘』，但係有無必要用呢種我上面講，所謂嘅『死老母』比喻嚟講呢？局部嚟講，你都可以講話中共搞『集中營』，但係推『赤納粹』，直接俾『中共=納粹』呢個信息出嚟，唔係人人都buy㗎！

退後一步嚟講，就算你嘅比喻真係技術上十分吻合，但係，比喻精闢係無獎囉㗎。你硬係要比較，咪好似gphone咁，話香港係新柏林，當其時DDR都係監控人民，高壓統治，但最後週一示威間接導致政權倒台，比喻貼切得嚟最後結果又夠正面，呢啲比較，唔會得罪到人，咪可以放心做囉。

『咁你都係怕得罪人啫！怕你就唔講，唔通啲藍絲同共狗話唔鐘意乜乜物物，你又唔講啦喎！』我怕唔怕得罪，最重要睇個人對我有嚟講有幾重要。深藍講咩，做咩，對於爭取我地嘅目標，完全無關痛癢，我唔怕得罪。得罪人可以，但係真係要睇下有咩回報。

十月一TAZ登報，我同報館嘅廣告負責人聯絡，睇完我地寫嗰篇文，佢話：『你ViSdP個名寫得清楚啲喎，到時我買蛋糕去探你監，都可以搵到你呀嘛。』兩個負責寫文嘅德國人，都幾次提醒我，要小心啲講法。尤其係八三一太子站傷亡人數同自殺案件掛鉤，根本未有官方渠道確定，我自己諗過幾次，到底寫唔寫好，大佬我出ViSdP㗎，如果有啲咩喺德國嘅愛國同胞一個唔鐘意，話我散播不實言論，搵律師告我，我個名放得喺ViSdP後面，係我一個人啃㗎！

但係我都要照講，係因為呢一個觀點，德國媒體真係無講，而我又覺得真係好重要，等啲德國嘅人道機構都可以關注八三一，Amnesty已經出咗報告，其他機構可唔可以添食呢？我唔知，但我講咗先，話我言論不實的話，就不妨去查證一下。惹火嘅言論，我唔怕講，最怕係講完之後，倒自己米咋。

『有無問過德國人？德國人點睇赤納粹呢個字？我認識嘅德國人（老公，朋友等等），佢地都好讚成用呢個比喻！網上啲人都鬧認字特警係Grammar Nazi啦！』

我無可能代表曬所有德國人，呢樣嘢喺我之前寫嘅文入面，已經強調咗好多次。不過我照答：我有問過，人數唔少。而且當中係有人贊成用赤納粹嚟比較的。

咁點解你都要反對用呢個字？

因為，每個國家都有自己嘅框架，有一套政治語言，如果要爭奪話語權，唔係話大聲就得，而係要用呢套政治語言嚟講說話。

睇返話唔介意講赤納粹嘅德國朋友，都係年紀比較輕嘅人，佢地同二戰近乎斷絕接觸（戰後第三代，最多聽下屋企爺爺嫲嫲講故仔嘅朋友），當然無咁敏感，對於香港中國嘅局勢又比較理解，所以都無咩所謂。但係依家政治體制入面嘅人，仲係戰後第二代，父母經歷過二戰，自己又有經歷過東西德，對於呢啲比較，自然敏感好多，唔識『政治語言』，都唔會入到個體制入面。媒體人就更加唔需要講，佢地講嘢就更加精準，清楚知道『政治語言』嘅重要性。你搵啲網絡上嘅例子俾我，有咩價值？

你見德國啲政客有陣時好似成日講廢話咁，支持香港，好似講得好悶，得三幅皮，你以為特登㗎咩？廚師煮飯，識煮嘅，調味料唔會落得多，好多時候都係三幾樣，係點樣配搭組合煮得好食，先係有功架嘅地方。講『自由』，『民主』，『人權』，『反極權』呢啲嘢，啲德國人先容易入口，之後先可以一步一步咁帶落去講。你依家一嚟就講『赤納粹』，呢個講法，真係成羹蝦醬咁撻落嚟，你就覺得好有鮮味，啲鬼佬聞到係覺得好腥㗎！

有朋友有疑問，但係問得高汁，我想喺度提提：佢見到好多德國人都有用納粹嚟做比喻，比如話用嚟講AfD，而且有部分都有公開展示打咗交叉嘅Hakenkreuz，咁唔係代表呢個比較無問題咩？

係，德國本土，都偶有納粹比較，但係左翼咁做，其實都會惹起反感。德國人左翼反AfD，都係會扣Rechtsextremismus帽子，但其實分類上，佢地係Rechtspopulismus。呢個係大路，放得上檯，用『政治語言』嘅鬧法。咁你話，Rechtsextremismus，其實就係納粹啦。係，但係前者係政治語言，後者唔係，真係嘢嘢都講納粹，係極左先會咁做，而且你講到要去到NPD呢啲政黨，喺一個有限嘅框架入面，用納粹嚟鞭佢先叫安全。

如果要德國政界聽到我地講嘢，就係要用呢套語言嚟講，你可能覺得好左膠，可能你覺得唔夠爆。你啱，係好左膠的。我仲記得上次Bundestagswahl玩Wahl-O-Mat，有一條問題，問話學校應唔應該用Holocaust嚟做Erinnerungskultur嘅核心。我一個香港人，唔需要有咩歷史包袱，咁梗係話唔需要再講啦。不過呢個位連AfD都唔敢郁呀！佢地夠右啦掛，但係都唔敢反呢樣嘢。

你話我左膠，其實我唔係，不過事實擺在眼前：德國人係左膠。人地唔左，都唔會收難民，仲有香港人黃台仰李東昇，仲有劉霞艾神呀。成日話『共產黨最開心』，德國唔左膠橫行，唔肯收黃李，邊個最開心呀？我左膠？我不知幾想德國人膠多兩錢呀！

去到呢個位，又有人講『德國，歐盟做過啲咩？佢地都無撚用！搵美國仲好！』我絕對認同大家話『自己香港自己救』，唔可以假手於人。但係你叫『赤納粹』，喺香港又可以起到咩作用？有人話留言話，我地係表達自己感受，唔係要德國認同同情。咁你直接認你地自己圍爐打飛機咪算囉！如果我地香港人喺呢邊可以爭取到啲咩，一定係要落手落腳做，爭取媒體支持，改變返德國人對香港嘅認知，等政黨對香港支持增加（或者增加支持香港嘅政黨力量）。

咁講好遙遠，等我幫大家溫返書先：

EU Parl有做Resolution，雖然最後嘅結論係無約束力，不過起碼喺EU度落咗個定論先。最後係呼籲全部EU國家唔好賣武器俾香港警察呀…

動議呢個Resolution嘅MEP，叫Reinhard Bütikofer，德國人，Grüne。

Margarete Bause，德國MP，Grüne。去咗慕尼黑支持香港人嘅集會。佢曾經想跟代表團去中國，但被拒入境。佢都有份逼德國政府披露中國國安喺德國嘅活動，話俾全世界知道，中國係有情報人員監視呢邊嘅香港活躍人士，要求德國政府遞解呢啲人出境。

Andreas Wolter，科隆市長，Grüne。接見過香港人，討論過點樣可以幫香港人（例如話想過嚟旅行嘅義士），表明支持香港民主運動。

Gyde Jensen，MP，德國人權事務委員會主席，FDP，做過聲明，表明支持香港示威者，並且提出，如果香港通過逃犯條例，必定要求德國修改同香港嘅引渡安排。

Christian Lindner，MP，FDP大粒佬。本來對中國有過美好想像，但係自從去咗香港見咗民主派嘅人，再返大陸畀人噴之後，就開行復仇Turbo，FDP旗下青年人政治組織搞過聲援香港集會，鬧過默姨姨點解唔親自接見gphone，鬧過Siemens大佬Kaeser掛住做生意，連社會信用評級都唔理。

Heiko Maas，德國AA Minister，SPD底。見過gphone，之後外交部真係開『吹風會』，SPD之後都反擊。

當然，大佬係CDU，呢個真係一座難移嘅大山，無奈CDU真係最大粒，入面個個人都食中共條水，點會肯翻檯。

你見到，凈係Grüne呢個左膠政黨，可以做到幾多嘢？

呢個表，唔夠長，我地呢邊嘅香港人，做得幾多得幾多。一時三刻，我地改變唔到啲咩，只能夠喺德國左膠框架入面，步步為營咁前進。但係你地有無諗過，做呢樣嘢係幾難，係幾需要深耕細作？一粒老鼠屎，壞了一鍋粥，點解硬要講赤納粹，要冒呢個險呢？

大家可能習慣咗無民主嘅抗爭，但係喺德國，票唔係屌返嚟㗎。你唔做媒體，唔做德國民意，唔放香港呢個議題入去Bundestag，點樣可以令德國『賀佢老母』呢？Bundestag夠人頭，『支助』中共幾十億，係咪可以考慮收皮先？我啱啱呢邊先收到E-Mail，有人想搵我分享一下，因為呢度附近有一個城堡，有中國買家準備買入，當地居民反對，但係唔知道點樣同人講佢地嘅擔憂。

機場呀，公司呀，依家中國大手大手買，紅色資本流緊入嚟㗎啦，仲有華為5G呀，會唔會出個收購限制先？林鄭個仔嚟讀哲學，有無Magnitsky俾佢嘆下呀？全部嘢，都係要用套政治語言嚟慢慢講，等德國政治主流變成反共先有得做。

「比喻精闢」的代價

你地咪叫『赤納粹』囉，比喻精闢啦，一語道破中共邪惡面目啦…但係你破壞咗香港人喺德國大眾心目中嘅形象，turn off咗德國人對香港人嘅美好想像。就係幫我地倒米，其他國家我唔敢講，德國一定係。

共產黨最開心？用多幾次赤納粹呢個比喻啦，邊個開心呀？

呢邊嘅香港人，花咗幾多時間搞登報，花咗幾多人力物力搞展覽，花咗幾多心機聯絡唔同嘅政治人物。依家我叫大家唔好用『赤納粹』比較，費事倒米，你地啲淨係識圍爐打飛機嘅契弟，就話我玩膠，維穩，話我係五毛？

如果我要批評的話，只能夠講，你地搵到個精闢獨到嘅比喻，圍爐打飛機，無話唔得，但係如果你地打到周圍都係，我踩到出句聲，你地諗一諗再屌，得唔得呢？我唔會話你地維穩，五毛，露底，但係你地真係唔好認為搵到個咩神來之筆，唔想你地用就要鬧，咁樣你地同啲盲毛有咩分別？鬧我嘅，我知道都係兄弟，但係各有各做，我話聲你知，諒解下我好唔好？

當然，打飛機打到上腦，都未叫做係主流。最後，我針對返大家嘅疑問，俾多少少個人見解。

加『反』，標誌上面打叉，會唔會就可以？

客觀上嚟講，一定會係好啲，但係爭議都係有。

德國人都有拍過電影，納粹點會完全唔講得？

無話唔講得，係睇你點講。所有藝術範疇嘅展示，都係例外。但係有例外唔代表呢個標誌同講法就無爭議。

咁我應該用咩字眼去形容中共？

大把。極權，法西斯，暴政，獨裁，乜都得，唔好玩納粹就可以。

攬炒巴就用『抗極權』取代『赤納粹』嚟做Rally嘅主題。攬炒巴點解唔用，有佢原因，我相信佢睇得通透過我。我覺得唔需要特登搵一個字嚟比喻。希特拉，納粹惡行，contextual嘅比較，無問題，但係唔好用一兩個單純而危險嘅字眼嚟套落去，否則又會做到『好似你死老母嗰時咁慘』嘅效果。

要講嘅係咁多，睇完都仲要用赤納粹，歡迎。大家都係各有各做，有人要倒米，我都係要繼續做，無辦法。