【德國工作點滴】二零二零，新年新開始

$No photo description available.$

三年半嘅時光，日日返工都係坐喺呢度，臨走嗰下回望，真係有啲感觸…不過我知道，終有一日，無論係咩方式都好，我會做返一個工程師。

新年快樂，ein frohes neues Jahr wünsche ich euch！

回望過去

對於我嚟講，過咗去嘅2019年，實在係悲喜交集，踏入「三張」之前，估唔到自己人生嘅軌跡都可以突然之間出現咁樣嘅變化…以前我有啲空閒時間，都會年尾做下回顧，回望一下過去一年，自己到底做咗啲咩。不過今年我覺得展望將來，比起回望過去更加重要，所以都係講下2020啦。

踏入新一年，我終於正式脫離工程師嘅身份，成爲一個（暫時性嘅）無業遊民。當初十一月遞咗辭職信，公佈咗呢個消息之後，我亦已潛水多時：無辦法，成爲一個自僱人士，唔算係一個好特殊嘅身份，不過點樣安排啲官僚嘢，真係唔可以低估。Krankenversicherung，Rentenversicherung，再要同Finanzamt，Ausländerbehörde講埋我職業上嘅轉換，等等等等，呢一連串嘅Bürokratie，我都仲未KO得曬。

不過，個頭已經開咗，依家係時候上返水。新一年，我希望同大家分享一下我自己有啲咩計劃，尤其係好多朋友都問我嚟緊一年會用咩方法繼續喺德國關注香港嘅抗爭，亦有好多朋友，問我會唔會開返德文班，所以我覺得有必要畀一個初步嘅答案畀大家。

展望將來

首先，新一年嘅年初，我會畀返少少時間自己，做返自己To-Do List上面積存已久嘅任務，畢竟我上一年年尾，實在放低咗好多嘢。同屋企人相處嘅時間少咗，自己好多興趣放低咗，好多應該要做嘅嘢，仲未開始做。

尤其係自己個書房同地牢，啲雜物已經堆到一地都係，成日都想等自己有時間先去執。而六月尾開始，我都已經無咩做運動，個人真係孱弱咗好多，成日俾仔仔惹病，以前一年都未必會病一次，今年就已經病咗四五次，最後呢一次仲係有細菌感染，喉嚨痕到咳咗成幾個禮拜，到依家都未好得返曬。咁樣落去，真係唔係好合符可持續發展嘅原則…

難得依家有一個俾自己呼一口氣嘅機會，我諗要好好把握。長路漫漫，休息好緊要。

到我可以重新出發嘅時候，我就會投放多啲時間去德國線度…

下次我會講下我點樣評估自己喺德國線入面扮演嘅角色。