【德國戰線】二零二零，所謂德國戰線

May be an image of text that says 'HONGKONGER IN DEUTSCHLAND V. 香港人在德國協會香港人在德國協會'

喺德國，有數之不盡嘅香港人，默默咁爲遙遠嘅家鄉付出，我只不過係其中一個人，嘗試盡力咁做好自己嘅角色。作爲一個從來無打算投身政治嘅「素人」，我好清楚自己嘅限制喺邊度，能力之內嘅嘢，我會盡做，其他嘅嘢，就留返俾其他人去爭取。

咁到底我自己可以做到啲咩？身邊香港朋友同德國朋友都曾經恥笑我係一個Allrounder，絕對唔係讚賞，但其實都唔屬於批評。我自己都成日話如果我係啲RPG嘅角色，我個能力雷達圖，其實無一條bar係好出色，好似一開始送畀你嗰啲角色咁，粗粗地用，都可以，貪佢攻防魔都有少少，但係唔可以攞嚟打大佬。

我本身係工程師一名，教開德文，搭多幾範，識講少少德文，睇開少少新聞，present到少少嘢，面皮有少少厚。簡單啲嚟講，就係周身刀無把利。所以我好早就知道，以我嘅能力，我係唔可能全力投身用政治形式去做，德國戰線火魔法師，我做唔嚟，做下哨兵，滅火隊員，一樣可以入香城Online德國server打。

咁我可以做到啲咩呢？

一：首要任務係做好香港人在德國協會嘅基礎，依家協會已經成功註冊，有自己嘅法定地位，亦都有銀行戶口，可以處理到簡單嘅收入同支出。不過協會仍然有好多嘢都未做好，到一切準備好之後，就可以招收會員，正式接受捐款，建構一個屬於所有香港人嘅「德國大台」。

呢度我想講多一句：我自己舊年年尾，搞e.V.第一個目標係做到個Facilitator，呢一步已經做到，但係我知道呢邊好多香港人都好期待e.V.可以發揮更加大嘅功用，無奈我自己之前無時間繼續再搞e.V.嘅嘢。今年我會俾心機做咖啦。

二：到協會基礎打好之後，我就會嘗試connect返呢邊嘅香港人，利用協會嘅基礎，起一個Project based嘅德國公海出嚟。德國香港人，話多唔多，話少唔少，好多時候做嘢，都未必好清楚其他人嘅定位，如果有一個德國公海，我諗點都一定有少少幫助。同埋我都會花啲時間，用廣東話或者德文寫一下德國線嘅分析同局勢，雖然我嘅觀點同角度都未必好全面，但係我相信對於「德國線手足」新手都會有啲幫助。

三：繼續幫其他喺德國嘅香港人做佢地想做嘅嘢。無論係展覽，Rally，義賣定聯絡，只要組織上有我可以幫到手嘅地方，我都會儘量幫忙。G20團隊嘅登報計劃，已經告一段落，不過我相信，其他計劃仍然會陸續有嚟，如果有需要用到我嘅地方，我會繼續努力。

我相信，呢幾樣嘢，係我自己能力可以做到，又會對發展德國香港人社區有最長遠同正面嘅幫助，夠做啦。其他嘢，我諗要見步行步。

圖：好多謝有份籌備協會嘅朋友，幫我地搵到設計師design咗一個咁好睇嘅Logo出嚟。