香港「nullen」
德文有一個獨特嘅動詞，叫nullen。德文Null，本來係一個數字，係「零」咁解。如果佢變咗做一個動詞，唔係代表「歸零」，而係講人生正式進入下一個十年，理論上要慶祝一下。
係呀，今日我牛一，終於從「二字尾」進入「三張」嘅境界。雖然我仍然未有村上春樹嘅境界，覺得人點樣都唔會霎那間變老，但係我聽過好多人講，話三十歲呢一條界線，係人生踏入壯年嘅一個里程碑。我真係唔知道，我三十歲嘅呢個狀態，會唔會代表我往後十年嘅生活？我掉返轉頭睇，十年前都估唔到嚟德國呢個決定，會令到我十年後變成另一個人。可能我離開咗自己嘅本行，跳咗入去一個新嘅世界，都會係一個人生分水嶺掛。
呢個禮拜，香港又會唔會踏入一個歷史上嘅分水嶺呢？
沒有最黑暗，只有更黑暗
呢幾日，呢邊天氣唔知點解陰陰沉沉，成日都無陽光，屈住屈住，又睇咗好多香港嘅新聞，我本來好少話會頭痛，但係個頭都赤赤痛，加埋呢邊肺炎疫情，生日都係安排唔到咩活動，係打算聽日同老婆仔仔出去行下山咁大把。雖然無搞咩聚會，但係好開心，好多朋友都有寫Message祝我生日快樂。
其實我知道，祝我生日快樂嘅人，好多自己都唔多開心。我諗依家呢個時勢，都無咩人開心得落。依家香港，正常人有邊個開心？
老實講，國安法呢下，快就真係快過預期，我以爲政府搞咁多動作，都希望避免做到樣樣衰衰，激起國際社會反感。但係，你唔好同我講你無預咗呢樣嘢會發生。見到有人講咩「香港最黑暗一日」，真係唔知畀咩反應你好。你唔開心，嬲，無助，我可以理解，我同你都一樣，但係你成日話「最黑暗一日」，係事實上嘅誤判，係蠢到天真都稱唔上。香港只會一日比一日黑暗，如果你要講，呢句句子基本上你日日起身刷牙之前都可以講一次。
香港呢個政治形勢都煲咗咁耐，你覺得今日就會係最黑暗咩？內會爭議出現嘅時候，你有預咗非建制選到咩？教育局話要DQ試題，你預咗考評局會頂得住咩？用暴動拉咗人，你覺得法庭會判得輕手咩？頭條新聞畀人投訴到呢個程度，你覺得佢又可以永遠做到落去咩？
Endgame？
你可能話我冷血，馬後炮，我想講我唔係。難得今日我牛一，請你原諒我，當係滿足我一個小小願望咁大把：我想問你，如果你覺得國安法來臨，代表「香港已死」，你想幫香港做咩身後事？同身邊嘅朋友講句「節哀順變」？「香港已死」，當係文宣嚟講，引人注意，絕對無問題；不過講嘅人，心入面真係唔可以有呢個心態。
除非之前全部行過出嚟嘅香港人死曬，否則你就唔好場場戰爭都當係Endgame咁打。我諗國安法通過（而我都夠膽講必然會通過），應該都可以話係「香港嘅nullen」，唔係之前嘅抗爭化爲烏有「歸零」，而係進入攬炒浴火重生嘅新「十年」。
同生日一樣，人變老，唔係年年生日嗰日變，我地認識嘅香港真係要消亡，亦都唔會係國安法落實嗰下蓋棺。
唔知你會點應對啦。我就會繼續默默努力，到下一次香港nullen來臨之前，我都會繼續教好德文，做我自己德國線做到嘅嘢，搵多啲錢步向自己嘅理想，食好啲訓好啲，做多啲運動，做好自己本份。嚟緊我會有咩新計劃，我安排好之後，會再同大家講講。
攬炒唔係炒菜，一下子就炒得成的。一時三刻，打唔贏場仗，就係要同敵人鬥長命，捱到下一次nullen，分分鐘敵人就真係變Null呢！
延伸閱讀：
此為石賈墨之原創文章，轉載前請事先徵求授權並註明出處 www.stegermatt.de
想緊貼我嘅最新動態？即刻Follow我嘅Facebook同Instagram！
有嘢想講？可以喺下面留低你嘅意見。
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment