【德國戰線】三個月之前，我寫咗呢一份筆記畀我自己

其實每一次寫「逸議漫漫」嘅稿畀眾新聞，對於我嚟講都係一個挑戰。

逸議漫漫

首先，我好享受寫作。以前讀書嘅時候，曾經有段時間真係好想成爲作家，但係我知道寫作係好唔簡單嘅工作，我自己唔係啲咩政治評論員，唔想拋個空嘅書包出嚟，不過又好怕讀者覺得我淨係喺度風花雪月，睇完之後浪費人生。

所以我都好希望喺個人嘅德國生活角度出發之後，都會畀到讀者一啲實在少少嘅得著。做唔做到，我唔知道，但係起碼我會繼續堅持落去。

而要做到「實在」呢一點，資訊就一定要夠新，香港嘅局勢千變萬化，好多時候我一兩個禮拜之前寫落嘅筆記，到交稿嘅日子，就已經無咩價值，被逼要喺三幾日內重新寫過一篇。

今日我開返份舊筆記，見到五月四號，我寫咗呢一句句子：

「我自己是好喜歡德國這個民族，德國人是正義的，無論現在的政治形勢如何，我相信都有變天的一日。」

當時，我想用德國環保主義者同右翼民粹崛起嘅形勢，去講往後德國政治風向轉變對於香港議題嘅可能影響。

呢一句句子，本來係作爲總結，想講自己一個「過份樂觀」嘅展望，當時我仍然覺得講大政治氣候可能有少少遙遠，就決定寫肺炎。呢個「德國三分天下」嘅題目，最後只係喺歌德嘅專訪入面略略一提。

相關文章：【石賈墨】歌德學院專訪系列#6：天無絕人之路

加速世界

當初我仍然不斷強調，世界趨勢非一時三刻就可以扭轉，雖然依家仍然只聞樓梯響，但係三個月前嘅樂觀展望，三個月之後，就突然之間再唔係一個遙不可及嘅距離。

天下圍中，大局已定。德國加入對華戰線，首先一定係戰狼「搬起石頭砸自己的腳」，明明全世界都已經爲人民幣服務，仍然唔理解「靜靜地贏唔得嘅？」呢個勝利嘅真諦。其次係全球風向一同改變，個個都買大，歐盟同德國都夠膽落注。

不過最後，我作爲喺德國一個曾經略盡綿力嘅香港人，都好清楚觀察到，無論係喺德國「檯面」大家認識嘅政治人物同組織又好，定係一大班默默無聞嘅「公海泳客」都好，佢地真係付出咗好多，係好多人超乎想像嘅投入，先會推動到德國線嘅發展。

既然風起了，我諗大家都要重新反思自己嘅角色，要向前嘅繼續向前，要退後嘅不妨退後，我諗咁樣大家先可以成爲時代革命嘅護航者。