【德國戰線】FDP好快就會提出馬格尼茲法案動議

少少背景：德國國會真正討論嘅地方，其實唔係國會嘅會議（例如英國），而係國會入面嘅委員會，通常推出咗一條法案之後，如果唔係緊急法案，好多時候都會撥返畀相應嘅委員會做內部討論，之後委員會就會畀出一個建議決定，先會交上大會做最後嘅決定。

如果FDP真係好似Gyde Jensen咁講，會出馬格尼茲動議，首先佢作爲人權委員會嘅主席，肯定會對委員會嘅建議決定有好大影響力，我估計今次呢個動議，委員會應該會有共識通過。所以戲玉就會去咗大會做Lesung嘅時候（即係二讀三讀），到底今次執政聯盟（FDP，綠黨肯定會訓身支持，AfD同Linke就唔好提）仲會唔會用「要繼續同中國對話」嚟做藉口否決？

我無水晶球，唔想開心得太早，但係我好希望我會估中：我覺得德國嘅馬格尼茲法案應該會通過，林鄭第二個喺德國讀緊希臘哲學嘅仔仔，可能好快又要因爲「家庭原因」返去同佢老母團聚。

原因：

一，FDP提出動議，如果完全無把握，估計都唔會提

二，馬斯當面收王毅皮，係一個新指標

三，德國政府官方代表進行人權對話，都夠薑公開話同中國無對話空間，中國人權狀況「dramatisch」，咁即係話德國政府嘅立場都已經變咗

四，GroKo就可能視呢個立場爲開綠燈，SPD唔係畀政府拉住的話，估計應該會投贊成票，咁GroKo應該唔會分開投票

五，可能GroKo入面嘅人都會諗，馬格尼茲行政上點做都會有空間，依家風頭火勢，投咗贊成先，之後要落幾多辣，再慢慢講

六，美國都做咗，跟機成本比較低

過咗的話，我諗我會開心到訓唔著！Book定小鳳姐檔期先！