相關文章：【石賈墨】歌德學院專訪系列#9：養兒一百歲，長憂九十九
時間飛逝，在德港人專訪系列嚟到最後一集。我地之前喺Facebook收集過唔同讀者嘅問題。喺衆多嘅問題裏面我地選出4條問題作為今集嘅問題内容。另外，石賈墨最後亦會分享佢喺呢個持續咗兩年嘅數碼專訪嘅一啲體會作爲專訪系列嘅總結。
歌德學院衷心感謝石賈墨喺呢十集為我地香港廣大讀者分享在德港人嘅生活點滴同體會。我地喺呢度祝福石賈墨同佢家人一切安好和，當然，身體健康！
喺FB中知道石賈墨喺德國成功創業。可唔可以同我們分享整個過程同當中碰到嘅困難？希望可以俾啲貼士想喺德國創業嘅香港人。
我搞嘅唔係啲咩大生意啦，但都可以畀到少少經驗之談畀大家嘅。
首先，我嘅情況比較簡單，因爲我本身喺德國已經有長期居留權，開公司所需要嘅嘢，其實同一個本地德國人無分別，如果香港人打算用創業嘅方式嚟德國申請德國簽證的話，係要用「自僱人士簽證」嘅方式，申請同審批嘅條件會複雜同嚴格好多。
如果講貼士的話，我諗有兩點我一定要同大家講：
一，大家都知道，德國係一個幾官僚嘅國家，開公司嘅步驟都幾繁複。所以開嘅過程，一定要有一個好清晰嘅Todo
List同時間表，要時時刻刻都好清楚知道幾時要做啲咩！一旦有任何疑問或者延遲，就即刻要打電話去問清楚相關嘅政府部門或者係機構。我自己一開始檢查公司登記名稱嘅時候，都等咗好耐，結果打去追問嘅時候，先知原來係佢地有人放假，唔記得交畀同事跟…
二，做「腦細」嘅門檻好低，但係做一個稱職嘅「腦細」就一啲都唔簡單。雖然我依家淨係請咗一個員工，但係勞工局註冊，商業登記，交醫療同退休保險，報稅等等，你唔好以爲有人可以完全幫到你，一定要自己有一個基礎嘅認識先！就算有會計師，保險經紀呢啲人幫你手，佢地極其量都只係輔助性質，真正令到一間公司運作順暢嘅人，一定係創業嗰個！
呢張相，係我喺路德維希港Ludwigshafen住嘅時候影低嘅，就咁睇落其實一啲都唔差…不過當你一走入個市中心的話，就明白點解有電視節目票選將呢個城市做德國最樣衰城市嘅第一名！
喺在德國大學畢業後，要怎樣尋找一份理想工作？
是否要先選擇工作城市，再找居住地方才可找工作及面試？
我好相信，每個人對於理想嘅工作，定義都唔一樣，有啲人認爲要搵好多錢先開心，有啲人認爲要做自己鍾意做嘅嘢，有啲人就認爲要做到有意義，幫到人嘅嘢…所以我諗第一樣嘢，真係要幫自己搵到一個答案先！
知道自己理想工作係咩的話，下一步就自然要去搵工啦！視乎行業同專業範疇，喺德國有啲城市嘅機會會特別多。用我曾經生活過嘅城市路德維希港（Ludwigshafen）嚟講，因爲係國際大型化學公司BASF總部嘅所在地，所以我知道有啲博士級嘅化學家都會選擇去路德維希港，但係路德維希港呢個城市真係唔太吸引，甚至曾經成爲一個德國電視節目票選「德國最樣衰城市」排名第一位…咁喺呢個時候，你就要做一個選擇：工作機會緊要啲，定居住環境緊要啲？如果工作緊要啲的話，都可以搵咗工先，先再決定住邊。
而要面試的話，依家肺炎疫情流行，德國人對於遙距工作嘅接受程度都高咗，見工第一次in好可能都係通過Video
call嚟進行，所以我唔會擔心見工呢個問題。
開公司，最重要嘅一步，係去公證處(Notar)度做公證。好笑嘅係，德國法律規定，公證處個律師，一定要一字不漏讀曬成份三四版嘅公司會章！我以爲聽佢喺度讀嘅時候望住佢會好odd啦，點知原來律師都好pro，讀嘅時候會解釋埋，時間好快就過。
除咗努力學德文外，香港人想從零開始係德國發展的話，有無建議可以比我地，應該向邊個方向唔會中伏，同埋可以避免走冤枉路
呢個問題好大路，但係我自己同過好多想嚟德國生活嘅朋友同學生好詳細咁傾過移居德國嘅計劃（入面當然係有人真係決定咗，而且仲係嚟咗德國添），諮詢嘅過程我成日都會提到「想像」呢個字。
你講話嚟德國發展又好，移民又好，其實最好嘅講法，係嚟德國「生活」：你要有一個對生活嘅「想像」先，先可以驅動到你去諗一個「德國發展路線」。假設俾你嚟到德國，五年之後，十年之後，你會想擁有咩生活？對於我嚟講，當初嘅想像好清楚：我想做一個可以發揮創意嘅工程師，同我屋企人過住簡單而舒適嘅生活。
目標聽落去好似簡單，但係要跳出香港，喺德國做一個平凡嘅人，對於一個香港人嚟講，其實就唔平凡。對德國生活嘅想像可以好稀鬆平常，但係捉住呢個想像嘅時候，就一定要落力搏盡先可以實現！
雖然個個人情況都唔一樣，例如話有家庭嘅人，可能嚟德國發展嘅唯一可能性係搵到份工然後嚟做嘢，但係普遍嚟講，我自己認爲嚟德國讀書往往都係最容易踏出嘅第一步。一嚟德國公立大學課程接近免學費，二嚟呢個係適應德國生活嘅好機會…唔好彩，如果到最後適應唔到的話，都可以攞一個學位返香港呀嘛！當然，我希望決定嚟德國生活嘅香港人都會愛上德國啦！
如果我唔係喺德國生活的話，肯定唔會有機會自己起屋，喺自己嘅花園度同仔仔剪草。可能對於德國人嚟講，呢種生活無咩咁特別，但係對於我呢個香港人嚟講，咁嘅生活以前真係超越想像！
TestDaF考試係其中一個報讀德國大學嘅條件。想問下要點樣準備好呢個考試，同埋香港有無得考呢個試？
無錯，TestDaF可以話係最普遍，用嚟證明自己德文水平足夠應付大學課程嘅考試，但係佢唔係唯一一個。相信問得呢條問題嘅讀者，對於報德國大學嘅條件都有一定嘅認識，咁我就唔講其他考試啦。呢個試，我當年讀書嘅時候自己考過，依家亦都幫過/幫緊學生準備，我諗到有兩個重要嘅貼士，可以同大家分享一下。
第一，要及早準備！好多之前嚟搵我嘅學生都有種錯覺，就係「我啲德文未夠好」，想溫多啲書，做多啲練習先，所以遲遲都唔肯開始準備考試。其實大家好早就可以上網睇睇TestDaF提供嘅模擬試卷同其他參考資料，落手做一做，就算覺得難，試做出嚟嘅結果唔理想都好，起碼都知道自己同目標相差幾遠，同埋可以有針對性咁提升自己嘅弱項。
第二，睇睇評分準則！其實TestDaF嘅考試有一個好固定嘅標準，大家可以參考返佢嘅評分準則，提升自己相關嘅德文能力。尤其係寫作，一定要知道考官會用咩角度去審視你篇文，符合到考試嘅要求的話，分數就自然會更加高。
呢度篇幅有限，我無可能將成個準備課程濃縮成一個答案，但係只要及早準備，而且理解考試背後到底想考核你咩技能的話，考試成績就可以有所提升！
呢個考試以前係由浸會大學搞嘅，而佢地嘅歐洲研究學系相信大家都認識啦，但係依家TestDaF係由歌德學院舉辦，一年會有三個digital嘅考試檔期。如果有興趣考的話，大家好快可以喺歌德學院嘅網頁見到，睇睇有邊個時間會啱你啦！預祝你考試成功！
睇呢張相，好快就睇到，呢度係歌德學院-更加準確嚟講係喺弗賴堡(Freiburg)嘅歌德學院。而呢張相係我喺2016年嘅時候，考C2考試嘅時候影嘅，當然呢個考試都可以作爲大學入學試啦！
但係學德文，唔會係純粹用嚟應付考試，因爲語言係最重要嘅溝通工具。所以，考完試都好，學德文嘅步伐都唔好停呀！
《在德港人專訪系列》不經不覺到咗尾聲。喺呢度你有咩同一衆讀者講？
哇，終於都嚟到最後一條問題！真係唔知道應該點答好！十個專訪，話長唔長，話短唔短，終於喺新嘅一年做曬成個系列…睇返啲專訪，真係好感慨。
首先，可以同歌德學院合作，係我嘅榮幸，喺呢度好多謝歌德學院語言部嘅主管Simone
Voigt同佢嘅同事Terry
Kwan嘅支持，因爲咁多篇專訪要做起上嚟，佢地都要做好多功夫！
但係我深信呢個系列係有價值嘅，因爲有好多朋友睇完之後，都有嚟同我講，話上網可以搵到好多有關德國文化嘅資訊同活動，但係用廣東話加香港人嘅角度嚟睇德國嘅生活，文化同語言，就真係唔多見有，所以呢個系列都算好創新。而我相信德國同香港嘅溝通喺將來只會越嚟越多！
最後，我當然都要多謝各位讀者嘅支持！喺度我都想同你地講多幾句我嘅感受啦：我喺德國渡過咗十個春夏秋冬，作爲香港人，呢十年，我對於自己身份，文化，語言，政治，居住地嘅思考，每一日都會帶畀我新嘅衝擊。我唔知道你係咪同我一樣，同樣地會享受呢種身處異鄉嘅挑戰，但係我可以好大聲咁講：如果當初我無把握機會移居德國的話，我諗我會好後悔，我嘅人生應該都無可能可以接觸到咁多新嘅事物。所以，如果有機會嚟德國的話，就嚟啦！
期待喺德國見到新嘅香港人面孔！
呢張相，見證咗我同歌德學院嘅合作：2019年四月嘅時候，我返咗香港，去咗歌德學院參加咗佢地講有關德國職場發展嘅Alumni-Talk，亦都有提出咗一條問題。
活動完咗之後，我同Frau Voigt, Terry有機會可以傾幾句，結果呢個專訪系列就因此誕生…
延伸閱讀：
此專訪出自石賈墨及香港歌德學院合作推出的「在德港人專訪系列」，文字版權屬香港歌德學院所有。此轉載幸獲香港歌德學院授權，原文出自於歌德學院網站：https://bit.ly/3tSfUyi
Dieses Interview stammt aus der Zusammenarbeit zwischen "www.stegermatt.de" und "Goethe-Institut Hongkong". Goethe-Institut Hongkong besitzt das Urheberrecht des Textes. Die Wiedergabe hier auf der Webseite wurde von Goethe-Institut autorisiert. Das originale Interview auf der Webseite des Goethe-Instituts: https://bit.ly/3tSfUyi
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment