相關文章：【石賈墨】歌德學院專訪系列#8：有志者事竟成
新型冠狀病毒 (Covid-19)嘅疫情，好大程度咁改變咗我哋依家嘅生活模式，亦都影響咗成個教與學嘅情況。全世界差唔多所有嘅學校同埋大學都要短暫關閉，好多教學活動都取消咗，或者係要改成喺網上進行。因為依家呢個疫情，大家重新討論教育嘅意義：到底點樣先係為之一個好嘅教育方式呢？今次專訪，我哋會問一問超杰，佢眼中香港同德國教育系統嘅不同，仲有佢認為教育喺呢兩個社會入面，有啲咩唔同嘅意義。而作爲喺一個港德家庭入面嘅爸爸，佢又有無一套對家教嘅獨特睇法呢？
大量嘅閱讀，喺德國係屬於教育嘅一部分，所以經常都會用電子產品嘅小朋友或者係年輕人，會畀到人一個印象，認為佢地冇受到良好嘅教育。但係喺香港，呢個情況可能有少少唔同，成年人一年平均讀到嘅書，係一本都唔夠。與此同時，香港嘅教學電子化發展得比德國好。
你覺得點解德國人會咁重視閱讀書本呢一個習慣呢？
其實上一次我哋講有關數碼化呢個話題嘅時候，我哋都有同樣嘅睇法，就係喺香港同德國兩個地方，個文化同情況都十分之唔同。
閱讀對於好多人嚟講，可能係一個吸收新資訊嘅過程，就好似我之前喺專訪入面都有提及過，對於香港人嚟講，一個科技好唔好，功能最重要。老實講，我自己其實都係鍾意數碼形式嘅媒體，相對印刷媒體而言，數碼媒體始終比較多元化，可以有多啲互動，同埋亦都更加有實時性。如果係想吸收一啲新資訊的話，數碼化嘅形式，喺好多嘅情況嚟講都係好啲嘅選擇。
從文化嘅角度嚟睇的話，德國情況肯定就好唔同啦！德國係好多世界知名嘅哲學家，詩人，作家，作曲家，音樂家等等嘅家鄉，咁所以德國文化嘅價值喺日常生活就已經好受到德國人嘅重視。我自己係有個感覺，德國人細細個就已經有呢一種珍惜自己德國文化嘅價值觀，而靜靜地抽時間出嚟睇書，亦都自然係屬於呢一個文化價值觀入面一個好重要嘅元素。
我而家係好難想像，如果我嘅生活冇咗電子科技嘅話，係會變成點。但係我都要承認，其實有陣時喺生活入面，又唔需要時時刻刻都追求嗰種即時性或者係功能性嘅。我細個讀書嘅時候，都有睇好多書。睇書呢個活動，對於我嚟講仍然係一個好有吸引力嘅活動，係有一種令人難以抗拒嘅吸引力，等人可以靜落嚟，休息一下。咁諗，其實香港人都真係應該睇返多啲書。
搵相搵咗好耐，終於俾我搵到一張完美糅合到電子科技，教育同家教嘅相！2018年我仔仔出世無耐，我已經有一路揹住佢，一路準備緊教德文嘅課堂筆記。唔係因爲有資訊科技，我都無可能做到遙距教學嘅效果，開展到自己嘅新事業！
喺德國，教育系統係會受到政府嘅資助。一個德國人，從幼稚園讀到上大學，教育都係近乎免費，而有小朋友嘅家庭亦都係會得到政府好多財政上嘅支持。睇返香港嘅情況。如果講國際學校的話，學費係十分之高昂，而香港嘅政策，對於有小朋友嘅家庭嚟講，都無咩特別嘅支援。
你認為呢一個情況，對於香港社會有乜嘢影響呢？
針對呢一條問題，我嘅答案都十分之清楚：如果你將個教育系統工業化的話，就一定會導致社會貧富懸殊兩極化。呢樣嘢，科學上已經證明咗係一定會發生。再加上政策唔特別支持有小朋友嘅家庭，我諗成個情況只會係越嚟越差。
我有啲香港嘅朋友，啱啱結完婚生完仔，應該好開心先係。但係佢地從小朋友一出世就已經要受到好大嘅壓力，呢樣嘢我係覺得好痛心。佢哋有咗小朋友之後，首先要第一時間去搵一啲最好嘅幼稚園同埋學校畀佢哋上。而呢啲教育機構，收費全部都唔平，但係呢個係佢哋嘅希望，佢地好想自己嘅小朋友可以有一個好啲嘅教育環境，將來又可以有多啲職業上選擇嘅空間。而因爲要搵好多錢供書教學，佢哋成日要OT，所以要放棄好多同小朋友一齊玩嘅時間，或者唔可以同佢哋一齊去旅行，賺到嘅錢都要儲起；到佢哋抽到時間，就輪到小朋友唔得閒，每一日都要做十萬八萬樣功課，再加埋啲唔同嘅「興趣班」，咁樣先可以令到佢哋喺一個充滿競爭嘅環境入面都唔會被淘汰。
每一次，我同啲朋友去解釋返德國嘅教育系統，再加埋德國政府對家庭嘅支援，例如話係育嬰假，育嬰金，育兒財政資助等等，佢地都會覺得德國簡直就係天堂。我自己都好感恩，德國嘅家庭政策比起香港，係做得非常之好。
對於我嚟講，教育係一個基本嘅權利，而唔應該係一個奢侈品嚟㗎！試想像，如果全部喺香港嘅學校，唔再睇下究竟個小朋友對於學習係有幾咁熱衷，而係淨係睇下究竟佢屋企係幾有錢嘅話。咁平等機會呢個原則，就已經唔再適用：貧窮家庭嘅小朋友只會更加窮，有錢家庭嘅小朋友，就只會越嚟越有錢。好可惜，我見到香港嘅趨勢，的確係走向呢個方向！
香港嘅教育系統嘅發展如果係咁，自然會令到香港嘅家長覺得非常之困擾。再加埋政治上嘅壓力，亦會令人覺得更加徬徨。我諗，短時間之內香港呢個教育制度都只會不斷惡化，但係我覺得，總有一日會有轉機嘅。
我細個嘅時候，仍然未太有嗰種「贏在起跑線」嘅風氣，所以仲有機會可以喺幼稚園度開開心心咁燒腸仔！ 我諗我都算好好彩，依家諗返起童年時光，都有好多好美好嘅畫面，唔係淨係得無限樣功課同測驗加默書。我諗依家香港嘅小朋友要面對嘅壓力，一定大好多。
雖然話香港嘅教育所費不菲，但係好多家長都好肯放錢落去畀小朋友接受良好嘅教育，首先佢哋第一樣嘢就係要搵一間好嘅幼稚園，然後就要搵好嘅學校，最後當然要搵一間排名高嘅大學啦。如果講國際排名，德國大學表現並唔係好標青，但係仍然有好多外國人想喺德國讀大學。
咁你覺得個原因係邊呢？而你又點樣去睇德國大學教育個質素係點呢？
排名呢一樣嘢其實真係十分之弔詭。你可以話佢係一個最好，最簡單直接嘅方式，去用嚟評估一間大學嘅質素，但同時亦都係一個最差嘅方式。冇錯，頂級嘅大學喺每一個範疇入面都係出類拔萃，絕對應該得到相應嘅認可同正面嘅評價；但係一間大學有幾好，又點能夠淨係用一個數字去表達呢？好多德國嘅高等院校都有一啲好出色嘅學科，例如話係哥廷根大學嘅政治學系，海德堡大學嘅醫學系，或者係慕尼黑工業大學嘅機電工程系。呢啲學系嘅畢業生，畢咗業之後，對於僱主嚟講，就係一個信心保證。一個出色學科畢業生嘅質素，我自己認為同大學綜合嘅排名高低係無直接嘅關係的。大家一都要知道，德國係無所謂嘅「野雞大學」的，就算一間德國嘅大學，佢冇頂級嘅排名都好，我都唔認為就代表佢嘅教學質素會差。
講開又講，其實德國嘅強項又點會淨係喺個教育系統度呢？德國經濟強勁，有創意，國際化，治安唔差，教育制度又好。讀書可能對於好多外國人嚟講，都係一個發展嘅起點，而我亦都係其中一個例子。所以，我都諗唔到原因點解唔應該嚟德國讀書！
好多人都估到，張相入面係邊一個德國出名嘅城市…無錯，就係海德堡！一開始嚟德國，我就住咗喺海德堡成年，呢個城市唔單止受遊客歡迎，連學生都好鍾意咖。點解？因爲海德堡大學係全德國最歷史悠久嘅大學，佢地嘅醫學系更加係世界頂尖嘅級數添！
其實教育呢樣嘢呢都唔係淨係通過幼稚園，學校，大學呢啲教育機構去做嘅，而係一開始喺屋企入面進行，家教可能係成個人生教育嘅第一部分。唔同嘅文化，對於何謂好嘅家教，個認知都會好唔同。喺中國有所謂嘅「虎媽」，而喺德國都有所謂嘅「直升機家長」。
你作為一個香港人，又同時扮演緊爸爸嘅角色，你覺得一個好嘅家庭教育，應該係點呢？有冇嘢係你同你德國嘅太太有完全唔同嘅睇法呢？
其實我自己覺得，好嘅家教，其實就係同下一代一路保持一段好嘅關係。無論我係咪嚟自香港都好，我覺得我呢個價值觀應該都屬於「跨國界」嘅思維。真係話思考自己做爸爸嘅角色，我時時刻刻諗得最多嘅係我點樣可以成為我自己個仔嘅一個模範，同時我亦都好希望我哋可以永遠都保持到一段親密嘅父子關係。
有一樣嘢，我覺得作為一個香港人，加上作爲爸爸，兩個身份重疊咗之後，係要留意嘅，就係我地香港人自己嘅文化傳承同埋語言傳承。所以我喺屋企只會同仔仔講廣東話，我亦都會同佢講自己細個聽過嘅故事，同佢一齊唱廣東話兒歌。既然我唔喺自己嘅家鄉度組織家庭嘅話，我覺得呢個責任大家一定要盡力去承擔！
針對你最後嗰條問題：好好彩，我真係搵唔到一個例子，係我同我另一半喺育兒觀上面有咩重大嘅分歧。要點樣教仔，我諗我地諗法真係幾一致。
不過我地生活喺德國，生活壓力無咁大，社會對於下一代應該要有咩價值觀嘅睇法比較開放同直接，無乜矛盾。喺香港嘅話，淨係要討論小朋友應唔應該放咁多時間落去讀書，可能已經有好大爭論啦…
我覺得，呢個世界上無人可以話邊一種教導小朋友嘅方式係最好嘅，但係有一樣嘢好重要，就係要同下一代建立一段好嘅關係，而要有好嘅關係，就一定要有好嘅溝通基礎。出於呢個原因，我喺屋企淨係會同我個仔講廣東話。我好希望佢可以理解到我嘅世界，大個咗都知道爸爸喺地球嘅另一邊，係有另一個家鄉的。
香港小朋友嘅出生率，好耐之前已經不斷咁下降，而德國都開始要面對同樣嘅問題。用你自己嘅角度嚟睇，你覺得個原因係邊呢？
我都幾肯定呢個問題係有一個科學嘅分析，而我自己唔係專家，咁就唯有純粹用我自己嘅感覺同直覺去答呢條問題啦！
首先我覺得政治上嘅紛爭同經濟上嘅壓力，呢啲因素都會係一個地方低出生率嘅主要原因，始終生得出嚟都真係要養，父母都知道自己係有責任要畀小朋友一個最好嘅成長環境。但我自己覺得都有一個因素要諗…養育小朋友呢一樣嘢，其實依家大家係點樣去睇？我哋而家身處嘅時代，好多時候去講一個人成唔成功，都係睇佢職場上面嘅地位，同埋收入有幾豐厚。嗱，呢樣嘢我都明白嘅，如果你可以喺職業上追尋自己嘅理想，亦都可以喺個過程入面建立到自己嘅財政基礎嘅話，得確係會令人覺得好滿足。但係家庭係咪一定要因爲呢個目標，而係變成障礙呢？
我有幾個朋友，成日都將生小朋友呢一個諗法不斷咁往後推，有啲甚至係直頭放棄生小朋友，打算自己兩個人一齊生活。佢哋有陣時個諗法係當湊小朋友等於一種生活上嘅限制，一定會好辛苦，要眠乾睡濕咁養大佢地，好似完全係唔會有樂趣咁樣嘅。如果好多人都係咁樣睇嘅話，我就覺得出生率低都正常不過…
生又好，唔生又好，其實組織家庭，係冇絕對正確或者係絕對錯誤嘅決定嘅。每一個人都應該有自己嘅選擇。對於我嚟講，仔仔出世，成爲人父，係我生命入面好重要嘅階段。擔起一頭家，雖然係辛苦，但係我覺得最後睇返，都會係一樣非常非常美好嘅事情嚟嘅。
照顧小朋友辛苦，就係人都知。不過湊仔嘅時間過得好快，轉眼間佢就可以自己一個坐喺度，望住你剪草。我諗唔需要好耐，佢就可以幫埋我手剪！
延伸閱讀：
此專訪出自石賈墨及香港歌德學院合作推出的「在德港人專訪系列」，文字版權屬香港歌德學院所有。此轉載幸獲香港歌德學院授權，原文出自於歌德學院網站：https://bit.ly/3tSfUyi
Dieses Interview stammt aus der Zusammenarbeit zwischen "www.stegermatt.de" und "Goethe-Institut Hongkong". Goethe-Institut Hongkong besitzt das Urheberrecht des Textes. Die Wiedergabe hier auf der Webseite wurde von Goethe-Institut autorisiert. Das originale Interview auf der Webseite des Goethe-Instituts: https://bit.ly/3tSfUyi
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment