相關文章：【石賈墨】歌德學院專訪系列#6：天無絕人之路
二月尾，香港已經有第一波新型冠狀病毒肺炎（COVID-19）嘅案例。依家肺炎已經變成疫情大流行，觸發全球危機。好多國家都宣佈進入緊急狀態，好多大城市都要封關鎖國。科幻電影嘅情節，依家竟然成真。今日今日，大家都好清楚，疫情過後，呢個世界將會變得不一樣，全球人類亦將要重新定義，何謂真正嘅「生活」。
今次訪問，我地問下超杰點樣睇香港同德國喺應付疫情同推進數碼化兩方面嘅分別。佢亦都會分享下自己嘅抗疫日常同佢喺呢段時期有咩反思。
十七年前，你仲係後生仔，經歷咗SARS，你對呢個疫情，仲有咩記憶？
一個字講曬：難受。我依家諗返起沙士，有時都覺得疑幻疑真，唔肯定到底自己有無經歷過呢個疫戰，因爲啲記憶實在係太唔真實。當時我先十三歲，年紀咁細，其實唔會話好驚，不過係無辦法想像原來我地認知嘅社會，可以一夜之間就完全停止運作。全部媒體都淨係報導我地嘅醫生同護士點樣落力打呢一場疫戰，我地亦不幸地要經歷生死，醫護人員死嘅死，病嘅病；學校唔開，街上面一個人都無。見到有人的話，個個都戴上口罩，但係大家亦都無辦法遮蓋口罩背後憂鬱嘅面容。
我仲好記得，當年有一日我返到學校，量完體溫之後，老師唔俾我入校門，因爲我體溫比正常高咗少少，當下我真係覺得好無助。啲老師就開始討論我應唔應該返屋企…好彩，重新量多一次體溫之後，個溫度終於正常返，我都鬆咗一口氣！自此我就知道，一個健康，正常嘅生活，唔係好似我地想像咁理所當然。
2003年香港經歷過沙士一疫後，都今日都依然歷歷在目。但係因爲香港能夠從當年嘅疫情中學習，所以今次肺炎再臨都可以有效率抗疫，唔需要好似歐洲咁封閉全個城市。所以成日都話，預防勝於治療。
當年沙士疫情未有導致到全球大爆發，原因係個病毒傳染性無咁強，當時全球化亦都無今日咁嘅規模。香港人當年都經歷咗好多悲劇，可以講係有「血的教訓」，你覺得德國依家有啲咩可以向香港學習？
古羅馬有一句拉丁文諺語："Si
vis pacem para
bellum." 翻譯做中文，可以叫「如要和平，必先備戰」。聽落去當然好似好誇張，但係香港人真係將依家嘅疫情，當成係一場「沒有硝煙的戰爭」嚟打，而對手就係一個肉眼無辦法睇得到嘅敵人。喺一場戰爭入面，係無人可以撓埋對手喺度食花生觀戰的。從爆發嘅第一日起，香港人已經保持高度警覺性，迅速行動，做好一切措施去保持公共衛生。其實講嚟講去，都係十七年前沉痛嘅教訓，教曉我地要咁樣應對疫情。沙士未嚟之前，其實香港人都係毫無防備。
我知，要搵到「散佈恐慌」同「理性行動」嘅平衡點，實在一啲都唔簡單。疫情初期，我聽到好多德國人話香港人「小題大做」，德國有一句諺語叫「一隻蚊，講到變成一隻大笨象」，就係用嚟形容啲誇大其辭嘅講法，尤其係一講到戴口罩呢個話題，好多德國人都會笑我地反應過敏。今時今日，好多德國嘅專家都承認，佢地一開始係完全低估咗疫情嘅規模。就算德國最權威嘅公共衛生機構Robert-Koch-Institut都建議喺公共地方戴上口罩，依家德國所有州份亦都有「口罩令」，民衆外出嘅時候，都一定要戴口罩。
我好希望德國將來可以對疫症有更加大嘅警覺性，清楚理解病毒可以有幾危險。而戴口罩呢個行爲，一定要成爲生活日常，除咗保護自己，口罩更加重要嘅作用係可以防止自己散佈病毒，保護到身邊嘅人。
係時候戴口罩啦！口罩喺德國從「無用之物」到「法例規定」呢個「華麗轉身」，需時只要短短兩個月。仔仔見到我戴口罩，都要戴埋一份。對於德國人嚟講，戴口罩遮着大半塊面，真係好唔習慣，不過戴得多，都可以成爲時尚潮物？
你依家喺德國又點樣應付呢個肺炎危機呢？對於你嚟講，生活上有咩變化？有咩對於你嚟講係未經歷過？有無咩你係從中有所得著？
我自己都覺得難以置信，零三年嘅經歷，我喺德國又要體驗多一次。我諗最難係要喺短時間之內，一下就改變曬平常嘅生活模式，又要斷絕同外界嘅接觸。尤其係仔仔，突然之間無曬啲小朋友聚會，無得出街同其他小朋友玩，我地就要更加花心機，喺屋企安排好唔同嘅活動。我覺得呢個情況，對於小朋友嚟講真係幾慘下。
如果講話有咩新嘢我係未體驗過的話，就係點樣計劃去超級市場買餸。依家我個個禮拜都要諗清楚，要買啲咩，買幾多先好，等我唔需要三兩日就去買一次餸。我亦都係屋企入面唯一一個負責買餸嘅人，等身邊健康唔係好好嘅家人可以避開超市呢啲人多高危嘅地方。
我其實算叫好好彩，疫情未爆發之前，我已經決定開始全職教德文嘅生涯，本身就已經日日喺屋企返工。所以我都好感恩，時間上比起其他人有彈性，又可以喺自己書房入面舒舒服服咁做嘢，唔需要話連工都無得返，三餐不繼咁慘。所以我又學曉點樣好好珍惜生活入面簡簡單單嘅細節，村上春樹講嘅「小確幸」，原來一啲都唔「小」。
當我見到香港關於搶廁紙嘅新聞，就連我喺德國超級市場都買唔到廁紙，我就係度諗，點解肺炎大家都咁需要廁紙呢？
因爲疫情爆發，所以好多學校，文化機構都要暫時關閉，好多商業機構都叫員工喺屋企返工，間接加速咗全球推進數碼化嘅步伐，你自己點睇？
我自己好相信，資訊科技同數碼化喺不久嘅將來，就會成爲我地教育系統同工作模式入面一個不可或缺嘅部分。好多人喺疫情之前係完全低估咗網絡世界喺我地日常生活入面，到底係扮演緊一個何其重要嘅角色。如果要搵一個疫情帶畀我地勉強叫「正面」嘅改變，我諗推進資訊科技普及，係少數我諗得到嘅例子。
其實我地日日都享受緊科技帶俾我地嘅便利：依家大家聯絡，都係用手機App多；唔同議題，都會喺社交媒體上面討論；買飛，又會上網買；連睇戲睇電視，我地都會Streaming嘅方式嚟睇…既然係咁，點解e-Learning唔可以喺我地嘅教育系統入面，扮演一個更加重要嘅角色呢？
我自己喺好多年前已經開始網上教德文，我自己人在德國，好多學生都喺香港，如果無網絡的話，呢種教學模式根本就無可能存在。
不過唔好誤會，遙距教學同喺屋企返工只係屬於理想教學同工作模式入面一個重要嘅元素，無可能完全取代學校同辦公室嘅功能，畢竟直接嘅溝通，都係好緊要嘅。但係數碼化嘅潛力，真係唔能夠低估！
網絡科技，喺肺炎爆發之前，對於我嚟講已經十分重要。你諗下，如果我無得上網，我根本就無可能越洋過海教到身處香港嘅學生德文。雖然對住個Mon嚟上堂，未必係最直接嘅交流方式，不過呢一種不受地理位置限制嘅教學模式，無論對於老師定學生嚟講，都真係叫開拓咗一個全新嘅可能。
數碼化同資訊科技喺德國嘅普及程度，實在有少少落後。歐洲議會推出嘅一啲資訊安全法例，有時候會阻礙呢一方面嘅創新。相比之下，香港人對於資訊安全，未必有深入考慮。你自己覺得香港同德國，喺呢個範疇入面，有咩唔同？
係，你講得啱，作爲香港人，我覺得德國喺資訊科技普及呢一方面真係要繼續努力。
好多香港人都好重視「功能性」，如果一個服務可以令到日常生活更加方便的話，好多時候都唔介意犧牲個人私隱，最緊要係好用就得啦。睇返歐洲人，尤其係德國人，因爲歷史背景，真係有另一個價值觀，有咩新嘢推出，第一時間就會睇清楚資訊安全嘅問題，亦都會好怕自己嘅權利會受到侵害。個服務好唔好用，反而唔係最重要嘅考慮。
呢個問題，同上面個「散佈恐慌」定係「理性行動」嘅兩難局面一樣，都係要取一個中庸之道。我自己個人認爲，所有人都應該對創新科技保持開放嘅態度，不過亦唔可以盲目信任所有新科技，永遠唔用批判嘅思考，諗諗新科技會唔會都有危險嘅一面。
睇返香港依家呢個咁嘅政治局面，大家學下德國人，都係小心啲處理自己嘅個人資料好。
我好相信，網上教學將會成爲我地教育系統入面一個好重要嘅元素。其實我地都可以考慮將一啲教學內容，轉化成爲一系列嘅影片課程。咁樣，學生就連時間嘅限制都無埋，可以跟返自己嘅步伐去學。當然，對於老師嚟講，有時候要兼顧咁多樣嘢，都唔簡單，不過我諗老師都要與時並進終身學習啦！
延伸閱讀：
此專訪出自石賈墨及香港歌德學院合作推出的「在德港人專訪系列」，文字版權屬香港歌德學院所有。此轉載幸獲香港歌德學院授權，原文出自於歌德學院網站：https://bit.ly/3tSfUyi
Dieses Interview stammt aus der Zusammenarbeit zwischen "www.stegermatt.de" und "Goethe-Institut Hongkong". Goethe-Institut Hongkong besitzt das Urheberrecht des Textes. Die Wiedergabe hier auf der Webseite wurde von Goethe-Institut autorisiert. Das originale Interview auf der Webseite des Goethe-Instituts: https://bit.ly/3tSfUyi
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment