其實我真正身份唔係一個德文補習老師…而係一個工程師。德文補習祇不過係我嘅一份兼職，做消防員，亦都祇係興趣，理論上我係應該講多啲我做工程師嘅故仔俾大家聽下嘅。
話説我返工嘅公司，專係負責設計同生產用嚟處理生果蔬菜嘅機器…唔係你想買嗰啲咩聰明料理機呀！雖然德國Vorwerk出嘅Thermomix真係好出名，但係我地整嘅係工業用嘅大型機器，就算買得起，屋企都一定放唔落。
搵到呢份工，本來都係撞彩。呢度背後有段古，不過呢個係後話啦…舊年我老細無端端走嚟同我講，有個客想處理牛油果，每日斷噸計，成幾千個！依家竟然仲係用人手處理，一個一個咁挖...真係好瘋狂。
"Hast du eine Idee?" 我咪話睇下囉。我快快手用咗一兩日砌咗部Prototype出嚟，我老細見到有嘢好似行得走得喎，開心到暈，即刻搵個客嚟傾。一搞，呢個Project就搞咗成年。
依家，終於有第一階段嘅成果——雖然都係要人手處理，不過成個流程改善咗，而設計出嚟嘅工具，令到挖出嚟嘅牛油果表面靚咗，少咗果肉浪費，而且啲工人唔需要再用力轉手腕，大大減低佢地嘅手腕勞損嘅機會。我去咗英國兩次，落到個site嗰度，見到啲工人用部Prototype用得好開心，其實都幾有成功感。
搞呢個Project都好多嘢好好笑，搵一單同大家分享下：
設計得咩機器都好，一定要用Product嚟試，呢個好易理解，但係因爲我地玩開嘅係生果蔬菜，屬於自然產品，好難跟個Spec設計完之後就一天都光曬，一定要揀啱嘅品種嚟試，而且一定要試得夠多，先可以下定論。所以我revise部Prototype嘅時候，每日都要用上一大堆嘅牛油果。你可以同批發商訂，不過無得自己揀。大細，成熟度，形狀，表皮狀態，統統都要考慮。
所以最好都係去附近嘅超級市場買。
第一次，我走入去，見到牛油果，就揀咗兩箱。
去到收銀機度，個收銀員呆咗。佢望下我，再望下嗰幾十個大大小小嘅牛油果，相信佢心諗：你咩料呀，要買咁多個牛油果？亞洲道士煉藥？成個表情充滿疑惑。佢即刻同個同事用Walkie對話，我以爲佢見得多中國人掃奶粉，以爲我想掃走曬全部牛油果，想同經理講，出『限牛令』，搞到我都心慌慌。
原來佢係叫個同事去數下有幾多個牛油果淨。我買得兩箱，其實都差不多買曬。佢就叫個同事入定貨。
搞咗一大輪，佢都係要做我生意咖啦，就開始數有幾多個。
"Wenn Sie mir glauben: 35 Stück sind sie."我揀完梗係自己數過，無謂要人數多次。佢又真係信我喎，直接就埋單。
如是者，每一次我做測試，都要去超級市場受盡『歧視』…我相信嗰段時間附近嘅超級市場嘅收銀員都知道我呢個『牛油果狂魔』嘅存在。我知道嗰日要試部Prototype的話，一定會著公司衫出門口，上面大大隻字寫咗"Nahrungsmitteltechnik"，講到明係食品科技，就知道我買啲牛油果返去，唔係用嚟自己食，而係用嚟試機，節省我唔少口水。
唔知你地又有無試過喺德國超級市場遇到啲咩趣事呢？
延伸閱讀：
此為石賈墨之原創文章，轉載前請事先徵求授權並註明出處 www.stegermatt.de
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment