【德文學習】超越巔峰！2018年完美終結之C2+里程碑

你可能覺得我好變態，但係我記得當初考完TestDaF之後，即刻買咗本講C2考試嘅書返嚟睇。係考完之後嗰日已經開始睇C2嘅書——我老婆話：你閉關咗兩個禮拜，依家考完試，竟然仲有心情睇書？其實考完試，德文水平係處於一個小巔峰嘅狀態，唔好浪費，一於食住上。我TestDaF Lesen係好彩有5的，然後我做C2份Lesen，係僅僅合格，咁我心裡面起碼有個譜，原來C1同C2真係可以差咁遠。

超越C2

我好早就好清楚，我終有一日一定要考個C2返嚟。
你咁聽可能覺得我好串，但係唔好誤會我：我決定咗留喺德國生活，我就唔當學德文係一個苦差，而係一個習慣，一個對自己小小嘅要求。所以我都係每日讀少少讀少少，個C2其實都係用日子換返嚟。

考完C2之後，我曾經有段時間，覺得自己無咗一個練習嘅目標…諗落，原來我就係一個犯賤嘅香港人，俾學校逼考試逼得多，無得考，依家反而就唔自在。所以我走去問我老師：『考完C2啦喎，我想繼續上，有無得玩？』

『有！去大學報Germanistik嚟讀啦！』
我心諗，講呢啲？不過一時唔知道『講呢啲』德文點翻譯好，所以吞返落肚算數。要我讀Germanistik就一定無可能咖啦，唯一真係有考慮過嘅係考個staatlich geprüfter Übersetzer返嚟，但係佢批准你考試嘅條件都真係好苛刻，更加唔需要講個考試本身係有幾難，所以最後都係放棄咗。

「C2+」歷程碑

講到C2『爆表』呢個問題：呢幾日聖誕新年放假，時間抽到出嚟，當然係用嚟陪屋企人，陪陪下，竟然俾我陪咗個『C2+』歷程碑出嚟。

話説我外母退休之前係教德文同英文嘅，語言水平十分高，我之前考試嘅時候，佢幫我改唔少Schreiben，我德文考試考得好，佢居功至偉。假日聚會，佢好鐘意玩Scrabble。

係呀，德文都有Scrabble的。玩法同英文係一模一樣，不過好自然因為啲字母出現嘅頻率同英文唔同，所以字母分數自然都會有所不同。講起Scrabble，德文叫有彈性過英文，因為德文可以自己組合啲複合詞Kompositum，所以好多時候可以駁上駁，令到成盤遊戲嘅延續性高啲。

娛樂嘅嘢，我一路都有參與，主要都係陪跑啦，分數唔係最低嗰個，我已經偷笑。Scrabble係好講究詞匯量，同埋對啲語素組合形式嘅熟悉程度。

舉個例子，唔知道大家知唔知，英文同德文嘅字母Q，喺一個生字入面，後面都一定會跟U的…
唔知嘅聽咗之後會覺得好驚訝，但係玩Scrabble玩得多就一定會學到。

話説食完聖誕大餐之後，外母又癮起，話要玩Scrabble。無耐又要以一敵三：退休德文教師，兩個心理學家（我老婆同佢家姐），四個對手都係德國人。

第一次，竟然俾我喺Scrabble嘅世界上，歷史性擊敗所有對手！
不過，叫得做遊戲，肯定唔係凈係講實力，運氣都一定要有。我今次真係好彩抽到靚組合（又有響音又有輔音），有機會出到三幾個屈機嘅字，一嘢就奪得幾十分，直接奠定我贏到其他人嘅基礎，唔知你見唔見到係邊幾個字呢？

二零一八年已經過去，新一年話咁快又到，喺呢度我都祝大家二零一九年有一個新開始，學德文嘅繼續堅持落去，嚟到德國嘅就希望生活順順利利啦。

月尾我會返香港一段長時間，希望到時可以抽到時間出嚟，好好實踐返自己嘅計劃啦！