【石賈墨】等我試下用三年轉換軌道

$May be an image of 1 person and smiling$

二零一七年初，我正式開始咗教德文嘅生涯。一路以嚟，都用遙距教學嘅形式嚟教。直到舊年返香港，先有機會開「真人班」，可以面對面咁教，感覺真係唔同啲，真係教得好開心，呢張相，係個課程Recording度cap出嚟的。本來以爲因爲住喺德國呢個限制，我呢世人都唔可能開真人班，結果兜兜轉轉，竟然都有機會可以做到。

你可能會問，投身運動，無論幾勇武都好，始終都要食飯，搵唔到食，我點樣可以維持我嘅生計呢？

係呀，事業真係好重要。放棄咗穩定嘅工作同收入，生活嘅壓力的確會多咗，作爲一家之主，我仍然要負起養家嘅責任。德國法定退休年齡係六十七歲，即係話，如果我健健康康順順利利，我仲要諗嚟緊三十七年我要用咩形式養妻活兒。

三十七年太遠啦，我唔知道可以點講，不如講下嚟緊三年我有咩目標啦！

嚟緊三年，我最終極嘅目標，係喺德國設立一間蚊型嘅實體德文補習社。

真係蚊型就夠，一年可以開到十班八班，請到一個半個手足，有足夠餬口嘅盈利，可以健康咁發展落去嘅基礎，我就已經好滿意。

識得我嘅人，都知道我係德國教邪教教主，好鍾意德國。不過，好多人雖然想嚟德國生活，或者係有機會，甚至有條件移民德國，始終都認爲德文好難學得好，同埋德國呢個國度，好似好遙遠好陌生，要嚟生活，好似無從入手咁。

我諗一個短期親身體驗德國生活，學好德文嘅機會，對於好多人嚟講，可能係第一步。萬事起頭難，如果我可以分享過去十年德國生活嘅經驗，學德文嘅心得，我好樂意咁做。德國人成日都講Integration呢個字，其實融入德國生活，無你想像中咁難，如果有人畀到一個所謂嘅Kochrezept你，你肯畀心機，一步一步照住嚟煮，雖然煮起上嚟，都會煮到滿頭大汗，但係唔會話煲燶粥的。

其實個Vision係希望可以一頁一頁咁樣寫好個Kochrezept出嚟，幫到香港人融入德國嘅生活。呢個理想，的確係好遙遠，不過我覺得千里之行始於足下，只要個方向係啱的話，就要一步一步咁走落去。

下一次我會講下，我會用咩形式去一步一步咁達到我嘅目標，同埋我會用咩形式嚟教德文。