我個人可能心情未必成日都好好（其實邊個可以呢），但係你話我會唔會好容易嬲呢？又唔會。
可惜，有啲人必需要寫入小氣簿，進行適量追殺，劑量唔好太多，每個禮拜一次每次三茶匙就夠，以促進心理健康，你話我心胸狹窄成個怨婦都好，無所謂。可能你都想寫我入小氣簿，請隨便，可以幫你促進心理健康，都算係功德。
未講我點解要，同要鬧臭邊個之前，先俾我講下自己嘅故仔。
記得有一次做Live嘅時候，啱啱好嗰時報名參加歌德嘅再進修課程，要scan張C2證書畀佢地睇，放咗喺檯面，講起學德文嘅計劃，就攞咗出嚟畀大家望一望。
對於德文C2呢個水平，有啲人認爲好遙遠，好難，覺得我好勁，所以張Cert好緊要，甚至叫我要過膠；另一方面我亦都聽過有人認爲「德文思異其實唔難」，「有思異唔代表識教」，「去德國咁多年/喺德國讀書/有德國老婆/乜乜柒柒都無思異就真係垃圾」。
當時我都話：其實張證書對我嚟講真係不是什麼，有唔代表你勁，無唔代表你廢，張嘢真係純粹紙一張，幾靚嘅，不過其實無咩價值，就算俾人攞咗去碎，都無咩所謂。古語有云，「證書穿腸過，德文心中留」，最緊要都係你想做嘅嘢，做到，做得好就可以。
賣廣告，當然我會講自己有C2打打底，但係如果大家有留意我每次覺得自己邊樣嘢可以沾沾想講，都唔會話我考咗C2，而係會話我已經有教咗超過1200個鐘德文，有十年教學經驗（教書經驗真係好重要，有機會再講點解），仲有我會俾人睇我學生畀我嘅Review。
我係咪讀日耳曼文學？係咪讀過德文系？係咪有「教師」資格？
唔係，唔係，唔係。
我未必好似啲大型語言機構咁，可以收成百個學生讀德文，但係我每開一班，我都好想好想入面每一個學生可以學到嘢，覺得我幫到佢。我寧願只要十個滿意嘅學生，好過賺一百個唔滿意學生嘅學費。
如果睇Review的話，我諗我都叫成功做到呢個目標嘅。
好啦，夠鐘入直路。
話說香港人在德國協會入面有好多有好心嘅香港人，知道好多喺德國嘅香港人，另一半係德國人，可能想學小小廣東話，所以協會特登搞咗一個成人廣東話BB班。
有香港人教德國人講廣東話，開唔開心？我就好開心。
一，香港文化載體係廣東話，我地成日話要保存香港文化，保育廣東話，除咗自己要講多啲，用多啲之外，教更多人講廣東話，就係薪火相傳嘅一個形式。廣東話作爲一種比起普通話無咁普及嘅語言（全德國好似得兩間大學有教，其中一間喺海德堡，點解我知？因爲我老婆上過個Course！）有人肯教，又有能力教，就必須要鼓掌！
二，協會提供嘅係「義教」，唔代表唔收學費…但會員收得四十歐，上足十六堂，計落一堂兩歐半，我頂，真係連買支大少少嘅水，上堂嚟潤喉都未必夠——No，連水都唔會有，因爲講咗導師係義教，係無錢落袋的！全部學費都會入返協會呢個非牟利機構嘅戶口，支持協會營運。
三，喺香港，好多人想做啲嘢，都無曬機會無曬空間，喺德國有人肯做任何有關香港嘅事情，唔好講咁多，我都會支持！
但係偏偏就有啲蛋散，阻住地球轉，喺個Post下面長篇大論，質疑導師嘅資格。
協會已經講明，導師有教大中文學位，教育文憑，有考語文基準試，德文有C1，有德國Schulamt認證同註冊。你老味，咁都唔夠？一堂兩歐半不如我畀個中文系教授你呀好唔好？
就算講得咁清楚，都仲要嘈，仲話「有證書，未必代表教得好」。呢句嘢講得出口，係囉，自己用個豬腦諗下，反轉嚟講，咪即係「無證書都唔代表教得差」啦？你又憑咩執住人地嘅教學資格喺度阿之阿左？個課程未開始已經咁多聲氣，仲話對課程有興趣？
小弟不才，完全想唔透呢啲人有咩動機。感覺好似啲地產經紀咁爲咗搶人生意而爆曬seed鬧人甚至大打出手——問題係，依家佢有咩生意要搶？點解要用啲咁白癡嘅方法嚟挑剔啲有心做嘢嘅香港人？真係想樣嘢好？
奉勸一句，提出意見可以，做唔到嘢又淨係識批評的話，都係考慮收一收皮，無人需要你呢啲價值連城嘅寶貴意見。
延伸閱讀：
此為石賈墨之原創文章，轉載前請事先徵求授權並註明出處 www.stegermatt.de
想緊貼我嘅最新動態？即刻Follow我嘅Facebook同Instagram！
想知多啲有關課程嘅資料？即刻Click入嚟呢到睇下啦！
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment