【德廣語言觀察 x 香港人深夜德文學堂】單車鍊之迷：「有早知，無乞兒」德文點講？

//逢星期一晚，香港時間夜晚九點，石賈墨德語補習社直播香港人深夜德文學堂，同你傾盡港德語言及生活趣事，想學德文，認識德國就千祈咪走雞！//

 

有次同我老婆睇電視節目，個名廚坐喺度，無情情講咗聲「單車鍊」(Fahrradkette)。

 

聽到我一頭霧水。

 

喂，呢個係飲食節目嚟咖喎，唔係運動節目，全程無講過單車，真係唔明佢無端端點解會講單車鍊。

我就問我老婆，咁佢就話畀我知，「hätte, hätte, Fahrradkette」係德國人講後悔都無用嘅講法。

 

我笑咗出聲，原來德國人都有少少周星馳嘅無厘頭一面，呢句嘢，咪就係「有早知，無乞兒」嘅完美德文翻譯？

不過，公道咁講，廣東話個版本比較make sense。咁「單車鏈」講法除咗押韻之外，到底喺邊度嚟？

 

翻查文獻，原來德國傳奇單車手 高立・牧斯特曼(Gaulup Mustermann)喺1999年歐洲山路單車錦標賽末端以爲穩奪首名，準備衝線，突然單車鏈無故斷裂，單車失控墮馬，痛失冠軍。之後受ZDF體育記者電視訪問，大叫「如果我有條單車鏈！」(Wenn ich die Fahrradkette hätte!)，令「hätte, hätte, Fahrradkette」說法成爲流行…

 

我都想有個故事可以講畀你聽，呢我上面個講法其實係Gaulup的😂…

所以叫你唔好咁輕易相信網上面嘅資訊啦…😂

 

畀我玩完，唔緊要，講返啲正經嘢先：

hätte, wäre, würde之類嘅動詞，來自haben, sein, werden（呢三個字如果你有A1應該都識）其實都係用嚟展現虛擬語氣嘅用字，德文同英文唔同，無分條件句做咩0123，操作上雖然好似複雜咗，但其實背後我覺得畀英文更加清晰。

 

老實講，如果德文完全無學過，嚟緊星期一晚九點你未必啱嚟，但如果學過少少的話，挑戰下自己，睇睇有無可能用A1 A2嘅底去了解B1 B2甚至C1嘅內容。

 

星期一見！

 

想重溫直播內容，咁就要去訂閱我哋嘅《每週德文教室》喇！