可以扮感慨！
因爲我第一個用新方法教嘅成個A1課程，橫跨接近成年，終於完咗啦！
「學唔學落去好？」
我唔直接答你，我用一個故事答你。
回想起當初喺中大，第一次學德文嘅時候，真係學到一嚿雲。好多書入面嘅對話同內容，都係明啲唔明啲，半生熟啃咗落去，嗰種「迷糊感」，今日都仍然歷歷在目。
唔知大家有無試過，做一樣嘢，略有小成之後（例如煮飯，做運動等等）諗返起之前啱啱學嘅嘢，覺得自己好柒點解當初會咁諗嘢，點解咁廢。
但係做人就係咁，始終都有第一次，正常嘅。
講返學德文，當時喺中大雖然上足一年堂，但好可惜我已經唔記得我第一個德文老師叫咩名，佢係一個喺基輔讀過書嘅中年男士，喜歡戴黑超，第一眼睇落有少少冷傲。但其實佢個人都好nice，傾落先知。
我記得當時我喺課程就嚟完嘅時候，已經同佢講我會去德國讀書，佢仲話佢暑假都會去德國旅遊，可以嚟搵我，好可惜當時我地無交換聯絡，結果同佢再無繼續交流嘅機會，可謂人生一大憾事！
如果命運能選擇，純粹FF嚟講，佢真係因爲見到呢個Post而搵返我，我諗我好想問佢嘅係：其實你估唔估到你教嘅學生入面，會有一個蛋散，決定繼續瞓身，喺六年之後考埋C2，甚至有能力好似你咁，教人德文？
估到？估唔到？定係佢會完全唔在乎？我唔知你哋點諗，但我自己諗返起呢個「第一次」嘅經歷，發現對我教書嘅風格，真係有莫大嘅影響。
自問都教咗香港人德文十年，我教過嘅學生，人數實在太多，所以真係咩人都有。有本身講流利日文，法文嘅同學，喺大公司身居要職嘅金融才俊亦唔少，而學生嘅學歷就更加唔需要講，大把碩博級人馬，我區區一個半途出家嘅工程師，點解可以成爲佢地嘅老師？
唔係我醒過你，唔係我勤力過你，唔係我有天份過你。
純粹得一點：我早過你開始。
即係龜兔賽跑，我呢隻龜早咗你六年起步，咁我考C2嘅時候，咪可以同隻兔仔講要點起步咁解囉。
我睇過一個研究，評估小朋友嘅學術表現。原來表現得好嘅小朋友，都係有一個最重要嘅因素。
同樣，唔係智商，唔係心態，唔係家庭背景。
而係之前有無學過類似嘅嘢(prior knowledge)，諗落真係正常不過，有學過就自然快過人啦！
所以，我教德文嘅時候，諗返我呢個經歷，對住班學生，雖然有啲誇張，但真心：我見到嘅唔係初學者，而係一堆未修煉成功嘅德文高手。有個朋友上完我堂，話我唔應該咁casual，著返件靚仔少少嘅衫，執靚個頭（心諗講呢啲…），上堂有錯唔好認，同學生講嘢唔需要解釋咁多，直接權威式咁壓落去，啲學生就會覺得你勁，當你神咁拜。
Authority的確有佢嘅價值，但係我成日覺得authority唔係靠authoritative嘅行事作風展現出嚟，而係靠自己累積一點一滴嘅心力同專注去做好自己嘅事，令人覺得你有經驗，有能力，咁個authority就會展現到出嚟。
所以我成日笑9啲中介，好鍾意話自己係「德國權威」。屌，有權威嘅人，點會叫自己做權威？你撻個朵出嚟，人地知你做邊瓣，做得好，自然係權威。
當有一日你知道「石賈墨」係邊個，講得出「佢教德文咖嘛」，諗起學德文，會諗起我，咁我諗我就成爲咗你心目中嘅權威。
既然我學生，只不過係遲過我開始嘅高手，個個都可以本事過我，我亦唔需要扮權威。呢個我認爲係近乎科學嘅推理。
「有料你企喺度插我唔係我企喺度插你啦！你啲咁嘅死蠢！」
所以十年嚟，我無鬧過一個學生，錯嘅話，話你知點改，一齊開心錯；啱嘅話，考試成功，一齊開心啱。無一個學生我真係覺得「蠢」，因爲我都蠢過。
仲有一樣嘢要講。
講返龜兔賽跑個故事都啱，除咗我係早過你六年開始嘅個隻龜之外，仲有咩我哋要從呢個寓言學得到？
無錯，真係小朋友都知，就係唔好好似兔仔咁，跑跑下中途去咗瞓覺！
「其實好多年前，我已經喺歌德學過A1啦！」
久唔久就會有報名嘅學生咁同我講。
你估下，佢哋嘅「陳年A1」，對於佢哋喺我課堂重新再學過德文，有無幫助？
其實睇人。
有啲學生真係識多幾粒字，學得快啲，但係好多都係煙消雲散。
你諗下，真係好可惜。只要佢當時繼續慢慢咁學落去，用我上面方法去講，只要早過人開始，幾慢都好，幾年時間，分分鐘就算無C2都起碼有B2。
仲有最經典嘅學生：「等我溫完呢個課程嘅書先，再搵返你上堂！」我知道好多都唔係話唔想繼續讀，隨便搵個藉口敷衍我算數，而係真心覺得要好好溫返啲嘢先，先可以繼續上。
你估下最後有幾多學生講完呢句之後，真係搵返我上堂？
一個都無，每一個學生都成爲一隻瞓著咗嘅兔仔。
用時間累積，用錢去睇，好似複利息咁，最後累積到嘅增幅，可以係超乎想像。同樣地，只要有計劃，慢慢學，只要每禮拜都堅持走一少步，三五年之後，你就唔會話我「學過」德文，而係我已經「學成」。
講到呢度，畀個機會你：嚟緊我哋就會開辦新一期嘅A2常規課程 - A2.1學期，報名參加，Keep going 學德文。
----------------
A2常規課程 - A2.1學期
日期：11 月 12 號起 （逢星期六）
時間：香港下午 4:00-5:30｜德國上午 9:00-10:30
報名方法：https://forms.office.com/r/ZhLnB1K5k1
課程特點：
以廣東話作講解，清晰理解文法概念
以理解為教學主軸，摒棄死記硬背形式
內容貼近 CEFR 框架，助你達到明確目標
導師團隊課內課外支援，功課問題冇有怕
「Keep going, keep going. 睇整體㗎，睇整體㗎，成件事好正㗎」
Write a comment