【德國工作點滴】不是最後一課的最後一課…

No photo description available.

上個星期五，上完堂，放低個耳筒，呢一個動作本來平常不過，但係今次放落去嗰下，有少少沉重。

我下咗一個決定：上完呢一堂之後，我會無限期暫停我嘅網上補習班…

德語補習社

兩年幾之前，工餘時間我仲好充裕，決定咗開補習社嘅時候，我可以投放好多時間落去搞。落手落腳整網頁，開Page，同報名嘅人慢慢咁傾下佢地學德文嘅需要，一切都他他佻佻。

補補下，轉眼就去到今年年中，我教過嘅學生已經超過五十個，嗰陣我試過一個禮拜上超過八堂，仲要唔計啲額外幫學生準備考試嘅課堂…一堂時間係個半鐘，咁你可以想像一下，除咗自己份正職之外，我係投放咗幾多時間落去補習社度。

嗰時，逢星期二同星期四，我Lunch都唔食，上晝返完工，下晝就飛奔返屋企，即刻上堂。而為咗唔會影響我週末陪屋企人嘅時間，我就安排咗星期六日晨咁早起身教書…曾經有段時間我係入咗『健康阿伯』模式，啲週末活動，全部都係去到十一二點為止，之後我就會乖乖地返屋企訓覺，為嘅，就係等我可以聽日七點鐘起身都可以精精神神咁上堂。

到返工嘅時間多咗，間屋開始起緊，仔仔出咗世之後，情況就自然好唔同…我好唔鐘意同人講『我好忙』，因為我成日覺得一個人話自己忙，其實好多時候都係自己啲嘢計劃得唔好，搞到自己好似連食飯訓覺嘅時間都無，唔係啲咩好值得話俾人知嘅嘢。

不過依家我覺得自己真係到咗一個時間好唔夠用嘅邊緣。所以我一路都無開到新班，因為我好清楚知道自己無咁嘅能力同時做好咁多樣嘢。

好啦，到我放育嬰假，返咗香港之後，我以為時間會鬆動啲啦，但係條數唔係咁計的：當你無咗日日要返工嘅負擔，你就會好自然想填補返自己喺屋企嘅角色。我依家每日都會起身，同仔仔梳洗，同佢換片，餵佢食下糊仔，親身孭佢出街，夜晚氹佢訓覺。雖然依家佢半歲人仔，但係我係感受得到，呢兩個半月嘅時間，係有令到佢同我嘅關係唔同咗：我再唔係一個下晝先返屋企同佢玩嘅男人，而係真係會陪住佢，好似媽咪咁照顧佢嘅『爸爸』。

時間上的取捨

唔係個個個老豆都有咁嘅特權。我好彩過咗德國做嘢，有一個咁嘅機會，身為人父，絕對唔能夠放棄。但係做人就係要有取捨，依家到我就嚟要離開香港，我知道我係無辦法繼續咁拖落去，終於都係要做呢個決定…一路都唔想放棄教班嘅原因，可能係我對於教德文小組班呢個『習慣』有一種不捨啦，即使返到嚟香港，keep到上堂嘅，都係最後一兩組，自己要投放嘅時間，已經係十分十分之少…相比起一個禮拜八堂連補課，真係濕濕碎啦！

但係，『一』同『零』嘅分別真係好大。上完最後一課，我真係覺得有少少感觸。
嗰晚，我同我老婆講，我啱啱同最後一組嘅學生上完堂啦！
佢講笑：『睇你個樣，想喊喎！』
『雖然我唔想喊，但係唔好講笑，我真係有少少傷心。』
當下佢即刻知衰，問我想唔想食碗糖水，佢會買俾我食。

咁又未去到要化悲憤為食量咁誇張，不過有糖水，點都食㗎！就喺佢落街買糖水嘅時候，我諗返起呢兩年幾嘅補習時光，我覺得自己得著真係好多好多。首先，我自己一開始學德文嘅時候，係讀得好辛苦，因為好多Grammar嘢係完全唔明，老師又唔識或者唔肯講，所以我係好在意好在意自己講解德文嘅時候，係真係可以令到學生聽得明，真係可以理解啲語法理解到清清楚楚。

德文教學的路程

唔係話我誇張，呢個能力，我呢三兩年係提升咗幾個呢。我記得幾個月前出差，路途遙遠，揸車揸咗六七個鐘，我以前未考C2，要學德文，就會用呢啲時間嚟聽Podcast學；到我依家要教德文，就會用嚟練教書…我會假設我隔離坐咗一個『學生』，然後就開始『教書』。

我記得嗰次我坐咗上車，開咗個GPS，一路揸，到我抵達目的地之後，我係完全唔知道自己揸咗幾耐。
原來我同呢個『學生』已經無間斷咁講咗六七個鐘書…

我要特登攞出嚟『練教』嘅Grammar，其實已經係啲唔太熟書嘅課題，如果你計埋我已經爛熟於心嘅部分，我紛紛鐘揸到返香港都未講得完。唔係呢兩年嘅訓練，我係無可能可以咁熟練，咁有自信咁同啲陌生人分享我學德文嘅心得。可以得到一個咁嘅技能，我真係覺得好開心。我成日都話我個C2無咩咁巴閉，呢句說話係出自真心嘅，我呢幾年嘅經驗，先係我可以沾沾嘅地方。

加上呢兩年，報名嘅學生，問我問題嘅網友，為數真係唔少…就係呢兩個禮拜我搞嘅Workshop，最多嗰個都有差不多成四十個朋友出席，呢個係我自己完全意想不到。因為教德文，我識咗好多朋友，聽到好多故事，體驗咗好多學生嘅成功同失敗，見到好多德國夢破碎，亦同時見到好多德國夢實現。我自問唔係啲咩成功人士，但係最有成功感嘅一定係啲學生同你講，佢地嘅德文有進步，係因為你幫佢地解決咗困擾咗佢地好耐嘅問題。尤其係備試嘅課堂，可以幫佢地有效咁提升考試成績，令佢地成功達到去德國嘅語言要求，我覺得有時我自己係會開心過個學生…

呢幾年真係好快就過咗，回想完嘅呢一刻，啱啱我老婆就買完糖水返嚟。而喺食緊糖水嘅時候，我發覺個人其實係鬆咗：雖然不捨，但我好清楚知道自己唔會再有時間約上堂，如果想要繼續幫人學好德文，唯一嘅出路，係整Video course。但係我一路都拖住拖住，唔肯狠心落去做，係覺得自己唔可以『放棄』自己辛辛苦苦建立咗嘅教學模式。

但其實條條大路通羅馬，幫人學德文，方法有好多個，我好相信，暫停補習班，唔係『放棄』，而係『重新出發』，點都係一個正確嘅決定。好好彩，好多人知道我呢個計劃之後，都大力支持：『我等你出片呀！』好簡單嘅一句說話，對我嚟講已經係好大嘅鼓舞！

嚟緊，除咗自己嘅工作，屋企人同間屋之外，我會將所有空餘嘅時間投放落製作網上課程嗰度。目標係將我自己講咗咁耐書所累積出嚟嘅經驗，盡我所能，壓縮成一個影片課程系列。希望可以達到好多學生對我嘅期望，可以自己睇完片之後，打好德文嘅基礎！

P.S.: 一個人力量有限，我依家誠徵合作夥伴，如果你對管理社交平台，製作教材同影片，教德文等等有興趣，有經驗，想同我一齊搞影片課程的話，歡迎你Facebook搵我傾！

P.S. 2：仲有樣嘢想講埋呀…早輪我返香港，參加咗歌德學院嘅一個講座，識咗好多人，本來我都怕佢地話我『踢館』，勾佢地啲客XD…佢地知道我背景都好，不但無好似我咁以小人之心度君子之腹，仲好積極咁問我有無興趣合作。大家都知道，喺香港，學德文最權威嘅選擇，一定係歌德學院。咁我當然好開心我地可以有合作嘅機會啦！依家我地已經密鑼緊鼓咁籌備緊一個Interview系列，將我喺德國生活嘅血淚史同趣聞，用幾條直接嘅問題還原返出嚟。四月中就會開始出街，到時大家一定要俾面支持支持！