來生不做中國人？
文件其實已經交齊哂啦，但係 Einbürgerung（歸化）嘅負責人話，依家條龍越嚟越長，照咁計，要等足一年，先會處理到我嘅申請。
係，我已經決定，唔需要等來生，今生已經不做中國人。
就咁聽落去，攞另一本護照，好似好大件事咁，但係其實你諗下，香港啲高官有幾多人有外國護照？當然，佢地攞得嘅護照，都容許佢地有雙重國籍，或者放棄之後可以重新申請，著數盡攞，但又唔需要完全放棄香港護照同身份證。呢啲人攞外國護照要俾嘅代價，差不多等於零。
唔同人有唔同睇法啦，就算德國唔接受雙重國籍，而需要放棄香港護照再入籍，我自己覺得都無咩大不了。
衰啲講句，護照咪又係旅遊證件一張。我依家喺德國落地生根，有幾何返香港，仲要留超過三個月？咁我攞德國護照，其實真係正常不過。到我返到香港，等陣有人話我「首先係中國人」，你可以點？德國本護照都唔係重點，避免「被首先」先係最重要嘅一環，所以最緊要係快快手剪咗本香港本護照，之後你話攞咩護照，其實都無咩所謂。
何謂香港人？
好記得，反修例一開始嘅時候，《蘋果》有同我做訪問，講起呢個問題：放棄本特區護照，唔會覺得自己已經唔再係香港人？
咁其實香港人嘅定義，可以有好多種嘅。
手入面揸住嘅護照，當然係決定我國籍嘅文件，但係我生於香港，長於香港，由細到大，學嘅係廣東話，聽嘅係廣東歌，受嘅係香港嘅教育。人生頭二十年嘅歲月，都係喺香港渡過，難道我可以喺換本護照嘅一刻，就同人講我唔再係香港人？
移民德國
講起離開香港呢個話題，由六月起，我依家收到好多香港人嘅 message，話想移民嚟德國。
德國從來都唔係移民國家，香港人最鍾意加拿大、澳洲、美國。移民嚟德國嘅香港人真係少之又少。大佬呀，你估德國入籍容易嘅咩，我以前都有講過德國申請入籍嘅條件，先唔好講咩其他嘅條件，淨係講話居住年期，正常都要八年（有可能可以變七年甚至五年，不過呢個係後話啦）。
你諗下，八年嘅光陰喎，人生有幾多個八年？
喺一個陌生嘅國度渡過八年，就算我保證你生活無風無浪都好，你有無咁嘅決心可以做到？更何況，離開自己嘅家鄉，去一個遙遠嘅國度，生活根本就無可能無風無浪。
「你可以為香港做啲咩？」
林鄭話撤回之後，我有講過，我自己好清楚香港嘅民主運動，唔會喺短時間內可以取得啲咩結果。我自己寫完出嚟之後，反而諗得多咗：如果呢一場自由之戰，係一場數以年計嘅抗爭，當下呢一刻，我呢個身處德國嘅香港人，應該做啲咩好？
我呢幾個禮拜不斷反復咁諗，喺我自己嗰腦入面投影一下，到底幾年之後，香港其實會變成點，然後一步一步咁回放返出嚟。
喺我悲觀嘅想像之中，我一個人嘅能力好有限，做唔到啲咩。我既唔係政治人物，亦唔係商業大亨，講話「可以為香港做啲咩」，呢條問題，我自問無咩資格答。其實我諗落，自己依家喺德國嘅生活，都叫做順順利利，可以有咁嘅條件，唔受限制咁表達自己嘅政見，自己覺得幫到咩就盡幫，唔需要日日擔驚受怕。我一個人能力有限啫，如果可以有多幾個「挾洋（德）自重」嘅「漢奸」可以一齊「反中亂港」，將「亡我之心不死」的角色，從美帝手上分一杯羹，都可算係一件美事。
咁其實客觀啲咁睇，我自己都係德文叫做比較好，可以同德國人溝通，幫香港人講解下大家嘅諗法，同埋喺度住咗幾年，對德國嘅生活同文化，比起香港人有多少少認識咁解。
有關德文嘅呢一部分，做緊啦：我已經整緊影片課程，所以我會繼續努力，希望可以盡快完成成個課程，最後再一次過推出。
有關德國生活嘅呢部分，我之前係完全無諗過可以認真咁做，每一次講啲德國資訊，都係風花雪月咁講。
好啦，咁你話嚟德國生活，認真咁講，點開始？
實在係想嚟德國？
第一步，我想知道，我篇文章接觸到嘅人，到底有幾多個，係真係好實在好實在咁計劃過嚟德國生活，甚至移民？
我講「實在」，有幾個條件：
一，確確實實學緊德文，無論學到咩程度都好。A1 學咗兩年都唔緊要，最緊要你真係有 keep 住讀。
二，你打算長時間，甚至永遠離開香港。當然，有人攞咗護照之後，覺得有選擇，可以再決定自己喺邊度生活，呢個無問題，但係八年呢一條線，你係肯定想跨過。
三，你自己有一個好清楚嘅想像，到底嚟到德國之後，到入籍嘅一刻，呢七八年，每一日嘅生活，你會點樣安排。當然，命運呢樣嘢，可以有好多意外，重點係你真係有一個合理計劃。呢度其實隱含咗一啲「次條件」，例如話嚟讀書就肯定要有一定學業水平同考試成績，嚟做嘢的話就一定要有專業技能，無大學學歷唔緊要，最緊要係有謀生技能。如果無呢啲前設，我唔清楚你點樣可以有一個合理計劃……
四，為咗實現呢個目標，你依家財政上已經有所準備。例如話儲緊錢，或者已經準備好喺關鍵時刻做出重大嘅資產轉移，例如話賣樓套現，然後喺德國置業。
五，你自問真係好了解德國嘅生活，知道德國有咩好有咩唔好之後，仍然覺得自己好想嚟。我以前有幾個學生，跟我學德文嘅時候，話想嚟德國，因為「好鍾意德國」，我問佢你鍾意德國啲咩？佢口啞啞……最後，呢啲學生德文都唔會學得好，因為佢學德文係基於「鍾意德國」，但佢「鍾意德國」又係基於對德國嘅片面認識或者係美好想像，當呢啲唔實在嘅想像消散嘅時候，學德文嘅動機都會灰飛煙滅。
六，你知道你要承受啲咩風險，亦都好清楚自己心理上承擔到呢一個改變一生嘅決定，知道自己有足夠嘅執行力，可以堅持到最後一日。
自問符合哂以上條件嘅，我誠邀你寫個 message 話俾我知（Facebook, WhatsApp, e-mail 點都好），鍾意的話，亦可以留言講下自己點睇呢幾個「前設」。我依家好想確實知道香港有幾多人想嚟德國生活，而你地又希望可以得到啲咩確切嘅幫助。
呢度可能都有好多人都已經定居德國，咁都歡迎你分享一下自己嘅經驗啦。
延伸閱讀：
此為石賈墨之原創文章，轉載前請事先徵求授權並註明出處 www.stegermatt.de
想緊貼我嘅最新動態？即刻Follow我嘅Facebook同Instagram！
有嘢想講？可以喺下面留低你嘅意見。
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment