圖片來源：立場新聞
駛咗錢等於做咗嘢？五項措施支援體育發展？
立場報導：「提 5 項措施支援體育發展 林鄭：肯定唔係三分鐘熱度」
咦，諗起有人講過「一定走數」！😂
記唔記得，曾幾何時，曾德成仍然係民政事務局局長嘅時候，傳聞試過同林鄭開會嘅時候曾經試過拍枱？
點解要拍？因爲CY話體育無貢獻，林鄭當時想滅咗個啟德體育城！唔係曾德城拍枱，我諗個計劃早就灰飛煙滅。
體育我識條鐵，但係STEM我叫有多少認識*（睇圖），一聽到呢啲政策，就知道又係「產業圍威喂」嘅時間。
我玩STEM嘅時候，係STEM仍然未叫STEM嘅時代...當時STEM界其實已經有好多黑暗內幕，依家諗起我都覺得好黐線。不過，呢個講幾日幾夜都講唔曬，有機會再開心share。
到依家有STEM呢個term之後，就無端端受到追捧。2017年，政府決定每年派二十萬畀中學搞STEM。
哇，好重視STEM喎！
結果，大把學校爲咗攞到筆錢，9買幾十部iPad，3D Printer，無人機，搵埋啲唔知邊度走出嚟嘅「導師」開埋啲唔知做咩嘅工作坊，然後就可以同人講我地都玩STEM咖，Yeah！
之後呢？然後就沒有然後。錢都攞咗啦，做咩問呢條問題。
報導入面，仲話「推動體育產業化」，聽到呢個講法，就知道必定失敗。
呢個講法，預示同樣嘅Pattern：吹捧 - 政府開水喉 - 「產業」（尤其紅資）冒起食住條水 - 圍威喂 - 完！
啱啱我講德國人有時候唔稀罕金牌，睇Comment，有人話我點解唔鬧香港嘅怪獸家長，批判香港嘅填鴨式教育。真好笑，點解你會覺得我無？講到底，香港要推動一樣嘢，講嚟講去都係話「產業化」「產業化」…教育都係，STEM都係，運動都係。
但係，有無諗過，有啲嘢要做得好，係唔能夠或者唔應該甚至唔可以產業化？
你自己睇下，科技園有幾科技？（關鍵字：科技園第四期）中藥港呢個講法你又記唔記得？可以講，香港政府想冚家產業化啲咩嘢，嗰樣嘢都必定冚家鏟化。
香港運動員，始終都係要香港人撐。
*2008年，我曾經著住背後印有「Hong Kong」嘅T-Shirt，代表香港參加喺美國加州舉辦嘅機械人比賽，雖然最後發生咗好多意外，成績唔係好好，但係都可以吹下，話世界排名61位😂
延伸閱讀：
【香港時事】嘈咩嘈，全世界都冇公民提名，德國都冇 （好似係）
此為石賈墨之原創文章，轉載前請事先徵求授權並註明出處 www.stegermatt.de
想緊貼我嘅最新動態？即刻Follow我嘅Facebook同Instagram！
有嘢想講？可以喺下面留低你嘅意見。
歡迎隨時聯絡我了解更多
WhatsApp: +4917695274920
Signal: +4917695274920
Telegram: @Stegermatt
Write a comment