學習德語 · 12.08.2020
上網見到新聞，蘋果控告一間小型公司，因爲佢地個梨形商標，侵犯佢地「簡單水果配合直角伸出葉片」嘅設計。咁都可以屈到，厲害厲害。
無獨有偶，德文有一句諺語，叫「Äpfel mit Birnen vergleichen」，即係「用梨去比較蘋果」，寓意胡亂比較，有不可同日而語嘅意思。
唔知你支唔支持蘋果呢？
學習德語 · 16.04.2020
武漢肺炎，肆虐全球，依家人人都要儘可能留返喺屋企，生活模式真係唔同曬。就算想學德文都好，依家歌德都暫停曬全部課堂，改用網上教學嘅模式嚟上堂，有時候真係覺得未必好夠喉。所以而家好多學生都問我點樣可以足不出戶，盡用網上資源嚟幫自己繼續學德文。我其實喺幾年前已經開始用網上補習社嘅形式嚟幫學生學德文，今次疫情，對於我嘅教學模式，影響其實係接近零…如果要人在德國，都可以教到香港嘅學生，你諗下，唔用遙距教學的話，邊有可能。
學習德語 · 08.06.2019
好多香港朋友都希望可以同身邊嘅德國人，講解一下，香港人依家有咩擔憂。
更加有朋友分別喺柏林，法蘭克福同科隆搞咗集會，佢地好多都嚟搵我，希望可以用德文整返啲海報同道具。
由於時間好緊逼，加上呢個題目都好深入，好多字，都都唔知道最達意嘅講法係點講，所以我知道自己翻譯得唔太好，有少少錯誤，如果大家見到，請海量包涵，並且話俾我知等我盡量改正。
學習德語 · 17.02.2019
我喺好耐之前寫嘅血淚史入面寫過：我講德文嘅口音算唔錯，可以呃到一啲德國人，以為我係喺德國大嘅華人。但係我都講過，無口音，遇正啲對語言唔係好敏感嘅德國人，真係好慘。 扮曬蟹！唔係呀，慘痛經歷係真人真事。
我記得我實習嘅時候，公司入面嘅Hausmeister（類似管理員之類啦，管公司燈油火蠟嘅人）係一個中年嘅阿叔，唔識講英文，德文亦有極濃重嘅普法爾茨口音。
學習德語 · 06.02.2019
未返香港之前，我天真地以為，自己返咗香港可以有時間同大家日日風花雪月。
當然，呢個幻想破滅得十分之快。新手老豆，真係低估咗湊仔嘅威力…
我之前其實寫起好多嘢，因為無時間寫完，所以無出，但尋日喺Facebook睇到一篇新聞，實太正，今日夜少少訓，都要同大家分享。
學習德語 · 02.01.2019
你可能覺得我好變態，但係我記得當初考完TestDaF之後，即刻買咗本講C2考試嘅書返嚟睇。係考完之後嗰日已經開始睇C2嘅書——我老婆話：你閉關咗兩個禮拜，依家考完試，竟然仲有心情睇書？其實考完試，德文水平係處於一個小巔峰嘅狀態，唔好浪費，一於食住上。我TestDaF Lesen係好彩有5的，然後我做C2份Lesen，係僅僅合格，咁我心裡面起碼有個譜，原來C1同C2真係可以差咁遠。
學習德語 · 07.09.2018
好開心，收到一個學生幫我買嘅書。多謝曬你呀！
依家忙住湊仔，完全無時間睇書…其實老實講句，我自己以前係一條大書蟲，但係好可惜依家已經失去咗呢個習慣，有時間都未必會自己搵書睇。話雖如此，對於我嚟講，就算無時間深入咁去睇，起碼都可以好快咁揭下，翻查啲重點，印證返自己上堂講嘅嘢，可唔可以再用第二個角度去理解。而嗰幾本有關分級試嘅書，好自然係幫返自己提升應試技能，如果學生有計劃考試，可以更加有系統咁幫佢準備。
學習德語 · 09.05.2018
好多朋友睇過『如何學好德文生字？』呢一段片都有聯絡我，話我嘅講解幫到佢地用第二個角度去學生字。 首先多謝你地有睇到我整嘅呢段片，畢竟我都整咗好耐，如果可以幫到手，起碼都知道我啲心血係值回票價。始終我段片講嘅，都係一啲大方向，你地可能想再深入啲，了解我地可以點樣針對德文嘅十大詞類，去分析學生字嘅要點。針對你地嘅回應，我再花咗一段時間，將我呢幾年寫低有關學生字嘅筆記搵返出嚟，簡短咁濃縮咗落一張圖度。
學習德語 · 28.03.2018
早兩個禮拜，我教德文嘅經歷，添上咗好精彩嘅一筆。
我破咗自己嘅『最長連續補習』記錄——毫無間斷咁講咗超過三個半鐘書。
三個半鐘。 你可能唔覺得有幾長，比個標準你：正常嚟講，一堂係上個半鐘。而一對一的話，對於我嚟講，都幾辛苦，因爲要保持九十分鐘高度集中，即時回應學生嘅問題，刹那之間就要諗清楚要講咩。但其實最辛苦嘅係學生，經歷個半鐘嘅連續轟炸，學生個腦都必定會處於『超飽和狀態』。