【德國時事】嘈咩嘈，選舉資格審查委員會，德國都有（好似係）

教德文要備課，呢排講德國政治，所以更加留意啲政治新聞（其實平時都有留意咖啦…）早幾日見到ZDF有出咗一段片：要加入德國國會選舉的話，原來德國嘅政黨要通過「聯邦選舉委員會」Bundeswahlausschuss 嘅審查。如果要拒絕一個政治團體參選的話，需要三份二多數委員嘅反對票。

雖然，有嘢外國同香港唔同嘅時候，自己想要推，就話「唔需要崇洋，要發展具有中國特色的乜乜柒柒」，但要推嘅嘢，外國都有/無嘅嘢嘅時候，就自然話「美國/歐洲/銀河系都有/無乜乜柒柒」，簡單啲嚟講就係公我贏，字你輸。

但又令我諗起葉劉講過：「啲年青人聽到人講真普選，但唔知真普選係咩。人人都有投票權，但冇可能人人有提名權，聯合國公約無講到，英國無，美國無，法國無，德國無，意大利無…」

傳送門：【香港時事】嘈咩嘈，全世界都冇公民提名，德國都冇（好似係）

嗱，讀得書少嘅建制派又可以衝出嚟啦！原來德國都有「參選資格審查」的！仲唔執到寶？

ZDF呢段片，剪輯咗公開審查嘅過程，今年大選，有啲政治團體可以選，有啲唔可以，睇唔明德文，睇畫面就可以，都好好睇。

但，要比較的話，有幾樣嘢要留意：

一，審查條件係依照法律嚟進行，當中會根據德國基本法，選舉法同政黨法做基礎，成個過程其實都係根據法律要求去檢查，絕對唔要求「愛德者治國」，然後你話愛就愛唔愛就唔愛。你見條片，好多入唔到大選嘅政治團體，係連公告同簽名都做唔足，先會被拒絕。而且，好似我講，拒絕政團參選，係要大多數人反對先可以，所以原則上係你做足文件要求，佢都唔可以唔畀你過。

二，委員會組成係獨立法官做委員，加上八位有投票權嘅政治人物嚟做監察，唔會有國安處嘅人審核，現任行政官員亦都無權干預。全部審批都係公開進行，所有人要睇要參加要挑戰都絕對無問題。

三，德國玩政黨政治，所以重點係要有政黨歸屬先可以入到國會（大家可能聽過5%規則），呢個委員會係純粹睇政黨合唔合符要求的，只要你政黨「規格」正常，又攞到2000個公民提名（德文原來係叫支持簽名Unterstützungsunterschrift）（另：今年好似淨係要500個公民提名就得，因爲有肺炎），有提名就任何人都可以選，唔會審查個人背景。所以唔係「候選人資格審查」，而係「政黨」規格審查。

四，屌！民主同暴政有咩好比較，唔好浪費時間。

就好似最後想參選嘅無政府主義政黨「普狗安那其黨」（音譯）咁講：嬲嬲豬，早知入唔撚到閘的話，今日就唔特登唔飲酒*啦。

*唔飲酒，保持清醒，德文有一個字叫nüchtern，中文無。特登唔飲酒保持清醒，德文翻譯成extra nüchtern geblieben

截圖Quelle：ZDF Heute